Vetëm pak ditë pasi futbolli turk përjetoi një skandal të rëndë me presidentin e klubit të Ankaragyçy i cili goditi me grusht gjyqtarin, ka ndodhur një tjetër ngjarje e rëndë, thuajse e pabesueshme për nivele të tilla. Presidenti i klubit të Istanbulspor në Superligë, ka detyruar lojtarët e tij që të braktisin ndeshjen, si protestë ndaj vendimit të gjyqtarit.
Istanbulspor, në radhët e të cilës aktivizohen disa futbollistë shqiptarë si Rroca, Et’hemi dhe Loshaj apo edhe ish-kapiteni i Egnatias, Xhekson, përballej sot me Trabzonsporin, në një sfidë që u braktis para përfundimit të saj të rregullt.
Ndeshja mes Istanbulspor dhe Trabzonspor, e mbajtur në Necmi Kadıoğlu Stadyumu (Istanbul), u ndërpre në minutën e 79-të.
Një ndërhyrje ndaj Florian Loshaj (Istanbulspor) nuk u konsiderua si penallti nga arbitri Sansalan A.
Besojeni apo jo, por presidenti i Istanbulsporit, Ecmel Faik, e pa të arsyeshme që të urdhëronte tërheqjen e ekipit të tij nga loja.
Ishte Faik që u kërkoi lojtarëve të tij të braktisnin ndeshjen dhe të largoheshin nga fusha në shenjë proteste pas vendimit të arbitrit për të mos dhënë penallti ndaj Trabzonsporit.
Arbitri mbeti i shtangur në vend, duke parë skenën pothuajse i habitur. Një tjetër moment që do të shënojë këtë sezon të vështirë në Superligën turke.
Një situatë e pazakontë e cila komplikon edhe më shumë situatën e Istanbulspor, i cili mbyll tabelën e klasifikimit në Superligë e tashmë do të përballet edhe me sanksione të rënda.
Discussion about this post