Futbollisti i skuadrës së Kukësit, Edison Ndreca ka komentuar situatën aktuale tek verilindorët si dhe sekretin e shënimit të golave spektakolarë. Ndreca ishte vendimtar në suksesin e Kukësit ndaj skuadrës së Vllaznisë.
“Normale që u ndjeva mirë që shënova. Kemi punuar gjatë gjithë javës me një skemë që unë të sulmoj në shtyllën e dytë dhe të shërbej për shokët. Sa herë që shënoj, gjithmonë i dedikoj golat. Janë nipat e mi që më frymëzojnë dhe goli shkon për ta, pasi ata më ndjekin në çdo përballje nga ekrani dhe më sjellin fat. Për Kukësin e dinë të gjithë se çfarë pretendimesh ka.
Për momentin në mendjen tonë është vetëm përballja e radhës në kalendar, të cilën duam ta kalojmë me sukses. Fituam dhe morëm tri pikët, por tani do të mendojmë për Dinamon. Si gjithnjë do të hyjmë në fushë për të marrë maksimumin dhe llogaritë normalisht do të bëhen në fund”, përfundoi mbrojtësi i Kukësit.
