Arben Ristani ka komentuar sot gjatë një interviste televizive ndryshimet që u bënë me 17 korrik në PD. Kujtojmë se në atë ditë Lulzim Basha propozoi 11 ndryshime duke përfshirë zgjerimin e kryesisë me të tjerë anëtarë dhe shtimin e numrit të sekretarëve. Ristani e quan propozimin e Bashës si shumë normal, pasi kërkesa ishte bërë në bazë të Kushtetutës.
Por, sipas tij nga ana e trupës gjykuese nuk janë respektuar të gjitha ligjet, pasi nuk janë shprehur brenda 30 ditëve nga depozitimi i kërkesës. “Gjykata e Tiranës, në një shqyrtim rutinë, normal, të kërkesës së Luzim Bashës, ka lejuar regjistrimin, në regjistrin e partive politike, të ndryshimeve qe PD, i ka bërë statutit të saj në korrik 2021. Vendim mëse normal, duke patur parasysh, se përmbajtja e vendimit të Kuvendit të demokratëve në korrik 2021, ishte sipas Kushtetutës së Shqipërisë dhe sipas procedurave të ligjit për partitë politike dhe procedurave statusore të PD.
Ndërkohë presin radhën, po në këtë gjykatë, për tu shqyrtuar dhe regjistruar, edhe ndryshimet e tjera që i janë bërë më pas, statutit të PD, ndryshime të cilat, janë edhe ato në bazë të Kushtetutës, ligjit dhe statutit te PD. E vetmja gjë që tërheq vëmendjen në këtë rast, është shkelja e ligjit nga gjykata për mos shqyrtimin e këtyre kërkesave, brenda afatit 30 ditor që kërkon ligji. S’mund të mos bjerë në sy dhe ngazëllimi i Bashës që ta paraqesë faktin, si fitore e njeriut që vetëm fiton, pa njohur humbje, si dhe kënaqësia që ndjen, kur sheh se në regjistrin e partive politike, ai figuron ende kryetar i PD, sipas statutit të korrikut 2021”, shprehet ai.
Kujtojmë se me 17 korrik, Kryedemokrati krijoi Këshillin Koordinues të Qarkut për organizimet elektorale, zgjeroi Kryesinë, Sekretariatet dhe shtoi strukturën e përhershme të Këshillit Koordinues të Qarkut. Në zgjerimin e Kryesisë është përfshirë edhe Kryetarin e Këshillit Kombëtar, Kryetarin e Bordit Financiar, Kryetarin e Komisionit Zgjedhor dhe Kryetarin e Komisionit të Apelimit, Integritetit dhe Etikes. Në këtë kryesi është ruajtur edhe respektimi gjinor, ku jo më pak se 30 % e anëtarësisë të jetë grua. Mesin e javës që vjen, pritet që Gjykata e Tiranës të njohë dhe ndryshimet e bëra në Kuvendin e mbledhur nga ish-kryeministri Sali Berisha, më 11 dhjetor të vitit 2021.
Discussion about this post