Ndryshimet në diplomaci/ Ja dy kandidatet që propozohen për ambasadore në Vatikan e Malin e Zi

Kuvendi, përmes Komisioneve parlamentare, pritet të nisë javën e ardhshme, shqyrtimin e kandidaturave të Ministrisë së Jashtme, propozuar për ambasadorë të Shqipërisë.

Pritet që rokada diplomatike të përfshijë rreth 40 seli në vende të ndryshme, ndërsa mes emrave që janë propozuar është edhe ai I ish-deputetit socialist Ervin Bushati si ambasador në SHBA dhe analisti Mustafa Nano si ambasador në Zvicër.

Ndërkohë, sipas Top Channel, një tjetër emër është ai I Zhaklina Petos, që propozohet si ambasadore në Malin e Zi. Peto që mban gradën e “Profesor Doktores” në drejtësi, pati një përplasje me Këshillin e Emërimeve në Drejtësi, që e pengoi të garonte për anëtare të Gjykatës Kushtetuese. Peto fitoi të drejtën për të garuar, madje pati edhe mbështetjen e Presidentit të asaj kohe, Ilir Meta.

Peto fitoi dy herë të drejtën për të kandiduar për Kushtetuesen, por në momentet e fundit u tërhoq nga gara, sikundër njoftoi në atë kohë KED.

Një tjetër emër I propozuar në trupin diplomatic është Majlinda Dodaj, e cila nga e ngarkuar me punë, pritet të marrë postin e ambasadores së Shqipërisë në Vatikan.

Dodaj prej të paktën 5 vitesh ndodhet si diplomate në Selinë e Shenjtë.

Më herët është raportuar se Ilir Gjoni aktualisht ambasador në Zvicër propozohet të shkojë ambasador në NATO pas daljes në pension të ambasadorit aktual Visho Ajazi Lika.

Vendin e Gjonit propozohet ta zërë analisti, Mustafa Nano i cili me parë ka qenë pjesë e shërbimit diplomatik.

Vendin e lënë bosh të ambasadorit në Emiratet e Bashkuara nga Ermal Dredha i cili kandidoi dhe fitoi si krye-bashkiak i Vlorës, propozohet për tu zëvendësuar nga Ridi Kurtezi aktualisht ambasador në Malin e Zi.

Ambasadorja e Shqipërisë në Holandë Adia Sakiqi, pritet te emërohet ambasadore në një tjetër shtet në BE.

Ish nënkryetarja e kuvendit Vasilika Hysi është përzgjedhur për drejtuar Misionin e Përhershëm të Shqipërisë pranë Zyrës së Kombeve të Bashkuara në Gjenevë. Ndërsa diplomacinë shqiptare në kryeqytetin e Austrisë, Vienë pritet ta drejtojë ish deputeti socialist Fate Velaj.

Ervin Bushati ish deputet dhe ish drejtues i PS Tiranë, është favorit për të zëvendësuar ambasadoren Floreta Faber në SHBA.