Partia Socialiste ka përgatitur një projekt ligj për ndryshime në Kodin e Familjes, që prek specifikisht çështjen e birësimit. Aty kërkohet që tani e tutje birësimi të lejohet edhe për ata persona që nuk janë të martuar, ndërsa ligji aktual nuk lejon birësimin nëse dy persona nuk janë të celebruar. Lidhur me këtë çështje ka folur sot deputeti i Partisë Demokratike, Tritan Shehu. Gjatë një interviste televizive ai tha se këto ndryshime janë goditje për familjen shqiptare dhe nuk duhet të aprovohen.
“Në këto ndryshime goditet familja pasi në këtë thuhet se birësimi të bëhet nga persona që nuk janë të martuar. Po kjo është pa sens sepse fëmija ka nevojë për familje. Në këtë mënyrë goditet rëndë familja. Por në këtë hapet rruga dhe për familje që nuk janë të martuar, pavarësisht se kjo kopje mund të jetë heteroseksuale kjo nuk është familje dhe nuk mundet që fëmija të birësohet nga dikush që nuk është familje. Këto ndryshime janë të paraqitura me një amulli, konfuzion, pa transparencë dhe krijojnë në këtë mënyrë një nocion tjetër të familjes, larg nga traditat dhe domosdoshmërinë. Këtu kërkohet të krijohet një model tjetër familje, dhe fëmija trajtohet si plaçkë”, tha ai.
Sipas tij , këto ndryshime po bëhen për t’i hapur rrugë kërkesë së çifteve homoseksuale, të cilët prej kohësh kërkojnë t’u jepet e drejta për birësim.
“Në momentin që ti pranon deformimin e familjes atëherë ti shkon shumë larg. Me këtë ligj ti krijon koncept të gabuar të familjes. Ne kemi konceptin tonë që fëmija duhet të ketë një mama dhe baba, jo prind 1 dhe prind 2”, tha ai.
Kujtojmë se vetëm pak ditë më parë Bashkia e Tiranës ka vendosur që në formularët për regjistrimin e fëmijëve në kopsht fjalët nënë dhe baba të zëvendësohen me Prindi 1 dhe Prindi 2.
