Me prezantimin e projektbuxhetit 2022 qeveria ka treguar se do të bëjë disa ndryshime në paketën fiskale. Propozime të cilat janë kundërshtuar nga bizneset dhe me një reagim kundër vjen edhe Dhoma Amerikane e Tregtisë. Përmes një letre drejtuar Kryetarit të Komisionit të Ekonomisë, Eduard Shalsit, presidenti i dhomës Enio Jaçe ka shprehur shqetësimin mbi ndryshimet e shpeshta dhe të pa konsultuara të paketës fiskale. Në letë thuhet se ndryshimet e shpeshta i bëjnë ligjet fiskale të paqëndrueshme dhe me efekt të kundër nga çfarë parashikohet.
Dhoma Amerikane shprehet e zhgënjyer që qeveria nuk ka lënë kohën e mjaftueshme për konsultim publik rreth kësaj pakete. Por, e aq sa është analizuar deri më tani evidentohet se kjo paketë është hartuar në kundërshtim me ligjin.
“Thyerja e angazhimit publik për një paketë fiskale të qëndrueshme me ndërhyrje të paktën njëherë në katër vjet. Pasi komuniteti i biznesit ka shprehur shqetësimin e vazhdueshëm, mbi ndryshimet e shpeshta mbi paketën fiskale dhe tatimet, si dhe në përshtatje me praktikat më të mira botërore, zyrtarë të lartë duke përfshirë Ministrin e Financave, Kryeministrin, etj., janë angazhuar publikisht për ndryshime më pak frekuente të ligjit, njëherë në çdo 4-vjeçar. Për rrjedhojë, ky projektligj bie ndesh me angazhimet publike qeveritare, pritshmëritë dhe planifikimet financiare të komunitetit të biznesit dhe dëmton klimën e besimit reciprok mes sektorit publik dhe atij privat mbi angazhimet publike.
Dhoma Amerikane vëren e zhgënjyer se u njoftua mbi projektligjet e paraqitur nga Këshilli i Ministrave mbi paketën fiskale 2022, pasi ato ishin miratuar nga Këshilli i Ministrave dhe ishin depozituar pranë Kuvendit. Kjo praktikë – fatkeqësisht e përsëritur – është në shkelje të ligjit nr. 146/2014 “Për Njoftimin dhe Konsultimin publik”, i cili i kërkon autoriteteve shtetërore t’i ofrojnë palëve të interesuara një periudhë kohore të përcaktuar për të shqyrtuar dhe ofruar rekomandimet e tyre në lidhje me projektligjin/et e propozuar”, nënvizon AmCham.
Në përfundim Enio Jaç i bënë thirrje qeverisë që të shtyjë afatin e projektligjeve dhe ta lërë më shumë kohë për konsultime paketën fiskale të ndryshuar. “Për arsyet e mësipërme, Dhoma Amerikane kërkon shtyrjen e afatit të projektligjeve, nëpërmjet zbatimit te ligjit nr. 146/2014 “Për Njoftimin dhe Konsultimin publik”, duke i lënë mundësi grupeve të interesit të ushtrojnë të drejtën e tyre duke u njohur me përmbajtjen e ligjit dhe ofrimin e sugjerimeve për përmirësimin e tij. Në vijim, Dhoma Amerikane shpreh bindjen se projektligjet kanë nevojë për përmirësim, i cili do të mundësohej pas reflektimit të rekomandimeve të komunitetit të biznesit. Një pjesë e problematikës është e bashkëngjitur”, thuhet në letër.
Në përfundim, dhoma Amerikane rekomandon nisjen nga puna për hartimin dhe konsultimin e një Ligji të Ri për Tatimin mbi të Ardhurat, që të harmonizohet me standardet ndërkombëtare dhe kombëtare të kontabilitetit.E.H/gijotina.com/
Discussion about this post