Ndryshimet e taksave në sektorin e Bujqësisë, si heqja e kompensimit 6% për fermerët, vendosja e taksës 100 lekë për KG për qumështin pluhur si edhe përjashtimi nga TVSH e importit të imputeve bujqësore, si dhe ndryshimet e tjera nuk cilësohen si hapa pozitiv nga ekspertë dhe kontabilistë. Përmes një interviste televizive, kontabilisti Bujar Bendo thotë se këto ndryshime do të shtojnë kostot për grumbulluesit dhe përpunuesit. Sipas tij, kjo skemë nuk ka ndikuar aspak në eliminimin e evazionit fsikal.
“Mënyra si është vepruar me kompensimin e fermerëve, ka dy nene në ligjin e TVSH për këtë. Ka qenë nga 20% në 6% pretendohet që skema ka funksionuar dhe ka pasur efeket pozitiv. Efekti i heqjes së 6% e bën nul dhe dy nenet duhen hequr se s’ka kompensim. Efekti do të jetë që të gjithë grumbulluesit dhe përpunuesit do të kenë kosto të shtuar. Dhe kemi rritur formalitetin dhe nga ana tjetër ka pasur evazion kjo skemë. Nuk më shkon”, tha ai.
Nga ana tjetër Klodian Muço, ekspert për ekonominë,” u shpreh se ndërhyrjet në paketën fiskale për sektorin e bujqësisë, e kthejnë këtë sektor në joprioritar. Sipas tij , këto ndryshime do të rrisin më shumë informalitetin në vend që ta reduktojnë atë. “Është një ndryshim prioriteti. Nëse më parë bujqësia ka qenë sektor prioritar i bujqësisë, tani i bie që të mos jetë më i tillë. Nuk e kuptoj dot se si mund të formalizohet blegtoria kur ti heq çdo rimbursim. Kur nuk ia rimburson TVSH-në, çfarë i duhet një blegtori që të ketë një numër NIPT-i? I intereson më shumë që të punojë në informalitet”, tha ai. Sakaq, ai bëri thirrje qeverisë që te jetë më e kujdesshme në vendimet që merr, sepse kështu mund të fus sistemin fiskal në kolaps dhe do të dëmtojë sektorin bujqësorë.
Discussion about this post