Ndryshimet në ligjin për komisionet hetimore bien ndesh me parimet kushtetuese. Kështu u shpreh në studion e “Ditarit” juristi Jordan Daci, sipas të cilit kjo ndërhyrje ndryshon botëkuptimin e ligjit ekzistues dhe e bën të pamundur hetimin parlamentar.
“Nuk ka patur nevojë për ndërhyrje kaq thelbësore, ndryshon të gjithë botëkuptimin e ligjit ekzistues dhe bie ndesh me kushtetutën. Bën të pamundur hetimin parlamentar ndaj çdo pakice parlamentare. Ngatërrohet nocioni i hetimit parlamentar me atë gjyqësor. E vetmja ngjashmëri është kodi i procedurës penale që përdoret për hetime”, tha Daci.
Sipas tij, ky ligj i karakterit kushtetues nuk mund të kalojë me drafte, ndërsa opozitës i është mohuar e drejta për komisione hetimore.
“Ky është ligj i rangut kushtetues nuk është ligj i thjeshtë që mund të kalojë me këto lloj draftesh. Këto janë ligje të karakterit kushtetues. Me ketë ligj bëhet iluzionare e drejta e 35 deputetëve. Nuk ka nevojë për të pasur indicie apo të dhëna për hetim parlamentar. Parlamenti duhet në funksion ligjvënës”, shtoi ai.
Deklaratën e Ermonela Felajt se puna e komisioneve hetimore ka dalë jashtë kornizës kushtetuese, Daci e konsideroi abuzive dhe foshnjarake. Sipas tij PS kërkon të fitojë kohë.
“Ky është vlerësim i pabazë, abuziv e foshnjarak për arsyetimin e këtij ligji. Mendoj që nuk do e kalojë kurrë kushtetuesen. PS do të fitojë kohë që mund të lidhet edhe me një agjendë politike dhe nga ana tjetër ky ligj kurrsesi, po do të ishte një gjykatë e dalë nga binarët, që nuk është se gjykata jonë meriton respekt, nuk do ta kalojë testin se bie ndesh me kushtetutën. Sikur të ishte perfekt ligji fakti që i bën në këtë moment lidhet me situatën. Edhe nëse do kishim dëshirë për të riparuar diçka. Ndryshimet e ligjeve të kësaj natyre duhet të ishin të qeta”, theksoi Daci.
Discussion about this post