Jo më larg se shtatë muaj më parë kjo ka qenë pamja në Dajç të Shkodrës, ku e gjithë zona ishte e përmbytur.
Aktualisht në zonë, pamja është krejt tjetër, por fermerët tregojnë pasojat e asaj përmbytje, që zgjati më shumë se 40 ditë. Teksa i pyet nëse dikush i ka dëmshpërblyer apo më e pakta i kanë pyetur për dëmet të japin këtë përgjigje.
“Akoma sot ka dëme nga përmbytjet, gjithmonë flitet se kemi 40% të prodhimit më pak. Nuk na kanë dëmshpërblyer akoma. Bashkia i ka marrë të gjitha të dhënat, por akoma po presim për ato dëmshpërblime” – shprehet fermeri nga Dajçit.
Ndonëse fermerët kanë guxuar të mbjellin sërish frika e tyre më e madhe nuk është shitja ose jo e produkteve, por nëse do të përmbyten apo jo, dhe natyrisht lutjet i kanë vetëm në Zot.
Të bindur se përmbytja nuk u vjen nga reshjet, por nga shkarkimet e hidrocentraleve, fermerët luten që personat përgjegjës të administrojnë më mirë nivelin e digave, ose të zbatohet ligji për digat për t’i dëmshpërblyer për dëmet që u shkaktojnë.
Gijotina.com kontaktoi me administratorin e njësisë administrative Ana e Malit, për të kuptuar në qoftë se në zonat problematike, si Oboti, Muriqani është marrë ndonjë masë për parandalimin e përmbytjeve të ardhshme, administratori Ben Ceni u shpreh se përveë pastrimit te kanaleve të 2 dhe 3 , nuk është marrë asnjë masë tjetër.
“Kemi pastruar vetëm kanalet e 2 dhe 3, nga ana e Bashkisë Shkodër. Masat e marra janë nga vet njerëzit, sigurimi i ushqimit, sigurimi i një varke në banesat e tyre. Ndërsa, kemi çu kërkesat e qeverisë për të ndërhyrë në ndonjë rrugë, por s’ kemi marrë asnjë përgjigje apo zgjidhje”,- u shpreh administratori i Njësisë Administrative Ana e Malit, Arben Ceni.
E njëjta situatë paraqitet edhe Njësia Administrative Dajç, ku kjo zonë ka vuajtur përmbytjet dhe dëmtimin e argjinaturës së Darragjatit, e cila u ça komplet nga vërshimi i tepërt i ujërave dhe si pasojë u përmbytën 6 banesa.
Gijotina.com ka kontaktuar me administratorin e Njësisë Administrative Dajç, Gjovalin Darragjati është shprehur se asnjë masë nuk është marrë nga pushteti qendror, ndërsa ai lokal ka arritur të pastroj vetëm kanalet e 2 dhe 3.
Rikujtojmë, se në qarkun Shkodër që nga muaji dhjetor 2021 deri në shkurt të 2021 janë përmbytur rreth 5000HA tokë bujqësore në njësitë administrative të Shkodrës, por sot Akoma nuk ,kujtohet askush nga pushteti qendror që të parandaloj një tragjedi të tillë të mundshme. Ku shpeshherë, banorët shprehen se këto përmbytje nuk vijnë nga shiu i rënë, por nga hapja e hidrocentraleve.
Ndërkohë, që një problem i vazhdueshëm dhe refren i përsëritur është ai i pastrimit të lumit Buna, ku që në vitin 2015 kur ishte ministër bujqësie Edmond Panariti ishte hera e fundit e pastrimit të këtij lumi. Banorët dhe pushteti lokal hera herës në kohën e përmbytjeve ka bërë thirrje për pastrimin e këtij lumi.
Me sy nga qielli dhe shpresën tek Zoti, banorët e Shkodrës por jo vetëm presin që masat të merren në mënyrë të menjëhershme dhe të mos vonohen, pasi muajt e dimrit janë përpara dhe ato janë të sigurt për përmbytjet dhe rrezikun që i pret.
