Kreu i grupit parlamentar demokrat, Gazment Bardhi, deklaroi sot se nuk do e njohin ndryshimin që iu bë rregullores së Kuvendit nga mazhoranca.
Në rregulloren e re të Kuvendit, parashikohet që deputetët të cilët tentojnë të bllokojnë punimet e Kuvendi do të përjashtohen tashmë nga 30 deri në 60 ditë.
Bardhi tha se nuk do i binden këtij ndryshimi dhe do e dërgojnë atë në Gjykatë Kushtetuese.
“Sot në një atentat të vërtetë ndaj pluralizmit, në mënyrë të njëanshme është ndryshuar seti i rregullave që garanton bashkëjetesën mes palëve politike në Kuvendin e Shqipërisë, në ndryshime që bien ndesh në mënyrë flagrante me Kushtetutën e Shqipërisë.
Për pasojë, vendimi i sotëm për pezullimin pa asnjë shkak kushtetues i mandatit të deputetëve të opozitës, do dërgohet për shqyrtim në Gjykatën Kushtetuese.
Ne nuk e njohim këtë ndryshim të njëanshëm, të dhunshëm të rregullores së parlamentit, për pasojë përveç ndjekjes së rrugës institucionale, nuk do t’i bindemi atyre rregullave për të cilat nuk kemi rënë dakord si rregulla të bashkëjetesës sonë në sallën e parlamentit,” tha Bardhi.
Discussion about this post