Edhe pse në shtator të 2019-ës u arrestua bashkë me disa biznesmenë të tjerë për mashtrim ndaj shtetit në lidhje me Tatimin mbi Vlerën e Shtuar, kompanitë e Shpresa Joanidhit vazhdojnë të jenë të preferuarat e institucioneve publike në dhënien e tenderëve. Dhe pikërisht tenderin e radhës e ka marrë nga ata që e shoqëruan gjatë arrestimit. Drejtoria Vendore e Policisë së Tiranës ka hapur një tender për shërbim gatimi dhe shpërndarje ushqimi për këtë institucion.
Tenderi mban numrin e referencës REF-30650-05-24-2022 dhe ka fondin limit prej 17,808,629 lekë të reja, ose rreth 212 milionë lekë të vjetra me TVSH. Në këtë procedurë ka marrë pjesë vetëm kompania “DION-AL” SHPK, e cila është në pronësi të Shpresa Joanidhit dhe familjarëve të saj dhe është shpallur fituese. Pra, tenderi është dhënë pa u zhvilluar gara dhe vetëm me kompaninë e Shpresa Joanidhit.
Përpos kësaj, vlera e ofruar nga kompania e Joanidhit është 17,733,645 lekë të reja pa TVSH ose rreth 212 milionë lekë të vjetra përfshirë TVSH-në. Kështu nëse krahasojmë vlerën fituese me fondin limit të tenderit, shikohet se është thuajse identike, përkatësisht sa 99.58% e tij.
Nuk është hera e parë që institucionet në vend bëjnë tendera me një konkurrent, por më e dhimbshme është kur këto procedura shkojnë për kompani që pronarët e tyre nuk paguajn as detyrimet ndaj shtetit. Siç e thamë dhe më sipër, pas një incidenti që i ndodhi në shtator të vitit 2019, emri i kompanisë së Shpresa Joanidhit ndryshoi në “DION-AL” SHPK nga “SHPRESA” SHPK që ishte më parë. Ajo dhe biznesmenët e tjerë u akuzuan në atë kohë nga prokuroria si shkaktarë të një dëmi prej miliona eurosh ndaj shtetit.
Por siç duket policia e cila e arrestoi, në shenjë “kërkim faljeje” i ka bërë dhuratë këtë tender pa e lodhur fare. E meqensë Shpresa fitoi sërish, ne nuk na mbetet gjë tjetër dhe të urojmë që ushqimi t’u bëj mirë policëve.
Discussion about this post