Prokuroria e Posaçme ka thirrur ditën e sotme Jamarbër Malltezin për t’u marrë në pyetje lidhur me aferën ‘Partizani’. Kjo është hera e parë që Malltezi thirret për t’u marrë në pyetje që kur ndaj tij u vendos masa arrest në shtëpi. Seanca është planifikuar në orën 10:00 me prokurorët Arben Kraja dhe Enkeleda Millonai.
Avokati i Sali Berishës, Genc Gjokutaj njoftoi dje se kanë depozituar në SPAK kërkesë për shtyrjen e seancës, pasi avokatët mbrojtës të Malltezit për shkak të impenjimeve nuk mund të marrin pjesë.
“Duke qene se mbrojtësit si te zotit Sali Berisha ashtu edhe te Zotit Jamarber Malltezi e kane te pamundur pjesëmarrjen ne te dyja seancat e pyetjeve për shkaqe objektive pune dhe familjare dhe duke konsideruar se kjo pjesëmarrje është e domosdoshme ata (avokatet) i janë drejtuar SPAK me kërkesë për shtyrjen e pyetjes se shtetasve te mësipërm për javën ne vijim ne një nga ditët qe ata do ta çmojnë të përshtatshme”, shkroi dje Gjokutaj.
Po ashtu, SPAK kërkuar marrjen në pyetje edhe të Berishës, ditën e nesërme, 18 janar. Edhe për Berishën, avokatët kanë depozituar kërkesë për shtyrjen e seancës. Me shumë gjasa, avokatët kërkojnë që ish-kryeministri të merret në pyetje pasi Apeli i GJKKO-së të shqyrtojë kërkesën e tyre për ankimim të masës së sigurisë arrest shtëpie. Po ashtu, avokatët i janë drejtuar me një kërkesës Prokurorisë së Posaçme, që të lejojnë Sali Berishën të marrë pjesë në seancat parlamentare.
Dhëndri i Berishës, u arrestua në Rinas në 20 tetor, nën akuzën e ‘korrupsionit’ dhe ‘pastrimit të parave’ në dosjen e ish-kompleksit “Partizani”. Ai u mbajt në paraburgim derisa u vendos masa për ndryshimin e masës së tij të sigurisë.
Discussion about this post