Drejtori i KESH, Erald Elezi, një nga vartësit e Belinda Ballukut është paraqitur ditën e sotme në Prokurorinë e Posaçme.
Elezi u mor i pandehur nga SPAK në muajin tetor. Ai ndodhet në masën e sigurisë arrest shtëpie me vendim të GJKKO si i përfshirë në skandalin “Balluku”.
Erald Elezi, është marrë i pandehur nga SPAK në kuadër të një hetimi të gjerë mbi abuzimet me tenderat publikë.
Hetimi nisi pas sekuestrimit të materialeve nga celulari i ish-drejtorit të ARRSH, Evis Berberi, i cili ndodhet në paraburgim për korrupsion dhe pastrim parash.
Akuzat ndaj Elezit lidhen me shpërdorim detyre dhe shkelje të barazisë në tendera. Sipas SPAK, ai dyshohet se ka përdorur funksionin publik në mënyrë të paligjshme dhe ka favorizuar kompani të caktuara duke cenuar konkurrencën e ndershme në procedurat e prokurimit.
Ky rast është pjesë e një dosjeje më të madhe ku janë përfshirë edhe zyrtarë të tjerë të lartë, si Gentian Gjylin, kreu i ARRSH, dhe 18 persona të tjerë.
Hetimi ka nxjerrë në pah një rrjet të gjerë abuzimesh me tenderat e financuar nga BE, duke ngritur dyshime për korrupsion sistematik në nivelet e larta të administratës publike.
Discussion about this post