Në burg për koncesionin e sterilizimit, Ilir Rrapaj kërkon lirinë

Biznesmeni Ilir Rrapaj, i cili është arrestuar për koncesionin e sterilizimit, ka ankimuar ditën e sotme, masën e arrestit me burg.

Nëpërmjet avokatit të tij mbrojtës, Rrapaj ka kërkuar masë më të butë sigurie, duke kërkuar të lirohet nga qelia.

SPAK e akuzon biznesmenin për mashtrim. Rrapaj fitoi koncesionin 100 milionë euro të sterilizimit, pasi në formularin e aplikimit ka shënuar se nuk ka njohje e konflikt interesi me zyrtarët vendimarrës.

Vendimi i Gjykatës përcaktonte se “ekziston rreziku që personat nën hetim Ilir Rrapaj dhe Klodian Rrjepaj të largohen duke iu shmangur drejtësisë.

Është për t’u përmendur fakti që këta persona në të shumtën e kohës qëndrojnë jashtë shtetit dhe nuk ndodhen në Shqipëri sipas sistemit TIMS. Këta persona janë me mundësi të larta financiare, mund të largohen lehtësisht nga territori shqiptar për të jetuar jashtë shtetit. Në këto rrethana rreziku i largimit dhe i fshehjes është tepër i lartë”