Në burg prej dy vitesh, vajza e Jakup Krasniqit bën dedikimin prekës

Gresë Krasniqi, vajza e ish-zëdhënësit të Ushtrisë Çlirimtare të Kosovës, Jakup Krasniqi i cili më pas shërbeu edhe si Kryetar Kuvendi i Kosovës, ka rikujtuar se babai i saj ndodhet prej dy vitesh në paraburgim në Hagë.

Në një postim në Facebook, Gresa rikujton se Krasniqi i ka dhuruar Kosovës shumë vite në burgjet jugosllave, më pas në luftë kundër pushtuesit serb e tanimë sërish për të mbrojtur dinjitetin e tij.

Lexo edhe: Akuzat për krime lufte, “Specialja” merr vendimin për Jakup Krasniqin

Postimi i plotë:

2 vite heqje lirie pa të drejt për njeriun më të drejt që kam njohur në jetën time- Babin tim!

“Kujt ja patëm borxh këtë Sevdije?!”

I kujtoj e rikujtoj këto fjalë që vin si jehonë e dhëmbin njësoj si herën e parë që i degjova!

Kujt do ti kishe borxh ti, që i dhurove Kosovës vitet e njëzeta në ilegalitet, vitet e tridhjeta në burgjet jugosllave dhe të dyzetat në luftë kundër okupatorit Serb?

Kujt do ti kishe borxh ti, që i dhe Kosovës forcë atëherë kur ish dorëzuar? Ti që i dhurove fytyrë e zë UÇK-së, atëherë kur shumëkush ndihej i frikesuar?

Kujt do ti kishe borxh ti, që gjithë këto vite dhurove, dhurove, dhurove pa mbarim e pa kushte?

Edhe në të shtatëdhjetat po i dhuron Kosovës gjithçka nga vetja!

Prandaj babi, në borxh hyre që diten kur linde, se linde për gjëra të mëdha! Linde për tu bërë kurban i lirisë që sot gëzojmë dhe urë për të ecur mbi ujrat e trazuara.

Borxh sja kishe askujt veç tokës Dardane!

Borxhlia është i keq, na thoje gjithnjë, e di që kurrë në borxh nuk hyre!.

Aktakuza ndaj Hashim Thaçit, Kadri Veselit, Rexhep Selimit dhe Jakup Krasniqit është konfirmuar më 26 tetor 2020. Sipas akuzës, së paku midis marsit 1998 deri në shtator 1999, Hashim Thaçi, Kadri Veseli, Rexhep Selimi, Jakup Krasniqi dhe anëtarë të tjerë të ndërmarrjes kriminale të përbashkët kishin qëllimin e përbashkët për të siguruar dhe ushtruar kontroll mbi të gjithë Kosovën përmes metodave që përfshinin frikësimin, keqtrajtimin, ushtrimin e dhunës dhe eliminimin e paligjshëm të atyre që konsideroheshin si kundërshtarë.