Banorët e Lumasit kanë hyrë në ditën e katërt të protestës për ndalimin e punimeve për ujësjellësin e Sinecit. Në vendin, ku 5 grevistët janë mbledhur ka shkaur mjeku për të kontrolluar gjendjen e tyre shëndetësore. Në një intervistë për “Fax”, ai u shpreh se grevsitët kanë filluar të shfaqin shenjat e para të luhatjeve me tensionin, por gjendja është e qëndrueshme.
“Gjendja është e qëndrueshme, dy kanë ulje të tensionit. Deri në këto momente gjendja është e qëndrueshme,”-tha mjeku. Ndërkohë që grevistët kanë përsëritur edhe njëherë kërkesat e tyre për kryeministrin Edi Rama, duke mos i kursyer akuzat për biznesmenin Salillari.
“Ne nuk tërhiqemi pa marrë një përgjigje nga kryeministri se nuk do të preket zona e mbrojtur. Kryebashkiaku Kreshik Hajdari le të dorëhiqet sa më parë. Edhe Ardi Veliu se na ka dhunuar. Salillari ka shkatërruar vendin tonë. Po djeg edhe pyjet. Rama është pala me oligarkun,”-shtuan ata.
Pas 3 muajsh proteste kundër ndërhyrjes në zonën e Sinecit, banorët e Lumasit kanë vendosur që të hyjnë në grevë urie. Agjencia Kombëtare e Zonave të Mbrojtura përmes një shkrese zyrtare pak ditë më parë urdhëronte Bashkinë e Kuçovës dhe firmën “Salillari” që të ndërpriste menjëherë punimet në Sinec pasi punimet cenojnë në mënyrë të drejtpërdrejtë, territorin e shpallur “Monument Natyror”.
Kjo gjë nuk e bëri firmën të ndërpriste punimet, gjë që ka sjellë dhe përplasje me banorët. Ndërsa dje, banorët e Lumasit u përplasën me ata të fshatit Vodë, të cilët kërkojnë ndërtimin e ujësjellësit.
