Edi Rama ka vendosur të ndryshojë grupin negociator Shqipëri-BE, duke përfshirë Ilir Beqajn, ish-ministrin e Shëndetësisë, i cili aktualisht mban detyrën e drejtorit të Përgjithshëm të Agjencisë Shtetërore të Programimit Strategjik dhe Koordinimit të Ndihmës.
Sipas RTSH.al, Beqaj zëvendëson në këtë grup Romina Kukon, e cila drejton këshillin bashkiak të Tiranës.
Gjithashtu Ilir Bejtja, negociator përgjegjës për kapitullin për energjinë largohet nga kjo detyrë dhe në vend të tij emërohet Enkelejda Muçaj, zëvendësministre e Infrastrukturës dhe Energjisë.
Beqaj është një nga emrat më të lakuar për aferat në fushën e shëndetësisë, ndërsa është marrë në pyetje nga SPAK dhe po hetohet lidhur me koncensionin e sterilizimit. Por duket se hetimi nga SPAK nuk ka penguar mazhorancën, më konkretisht Kryeministrin Rama, që të përfshijë ish-ministrin e Shëndetësisë në grupin negociator me BE-në.
Shpeshherë janë hedhur hipoteza se ish-ministri i Shëndetësisë mund ti shpëtojë ndëshkimit nga SPAK, edhe pse në jo pak raste mediat kanë njoftuar për një arrestim të mundshëm të tij.
Por deri më tani, SPAK nuk ka ndërmarrë asnjë veprim konkret ndaj një prej ish-ministrave të Edi Ramës, i cili vijon të jetë nën hetim.
Nuk dihet nëse pas detyrës së re që Rama i ka besuar duke e përfshirë në grupin negociator, SPAK do të vijojë ta ketë nën hetim, por mbetet e paharrueshme skena kur ish-ambasadorja amerikane, Yuri Kim, u largua nga salla në momentin që Ilir Beqaj mori fjalën në një prej konferencave që organizoheshin mbi donacionet.
“Mbështetur në ligjin për shërbimin e jashtëm, për krijimin, organizimin dhe funksionimin e strukturës shtetërore, përgjegjëse për zhvillimin e negociatave dhe lidhjen e traktatit të aderimit të Shqipërisë në Bashkimin Evropian, me propozimin e ministrit të Shtetit dhe Kryenegociator, Këshilli i Ministrave vendosi që në bazë të vendimit për përbërjen, rregullat e funksionimit dhe trajtimin financiar të grupit negociator dhe detyrat e Kryenegociatorit për zhvillimin e negociatave të aderimit të Republikës së Shqipërisë në Bashkimin Evropian, Romina Kuko, zëvendësministre e Brendshme do të zëvendësohet me Ilir Beqaj, drejtor i Përgjithshëm i Agjencisë Shtetërore të Programimit Strategjik dhe Koordinimit të Ndihmës”, thuhet në njoftim.
Discussion about this post