Një ngjarje e trishtë është regjistruar mëngjesin e sotëm në Berat, ku mësohet se ka ndërruar jetë drejtori i gjimnazit “Babë Dudë Karbunara”, Llazar Palla pasi humbi betejën me Covid-19.
Sipas burimeve, Palla kishte një muaj i intubuar në një spital privat në Tiranë dhe gjendja e tij shëndetësore u përkeqësua ditët e fundit. Mësohet se 62-vjeçari ishte infektuar nga virusi vdekjeprurës rreth 2-muaj më parë, por për shkak të gjendjes së rënduar ai u dërgua drejt Tiranës, ku ndenji i intubuar për rreth 1-muaj.
Të shumta kanë qenë mesazhet e ngushëllimit të kolegëve, përfaqësuesve të pushtetit vendor, miqve dhe nxënësve të tij në rrjetet sociale.
Kujtojmë se, gjimnazi “Babë Dudë Karbunara” ka qenë një nga shkollat e mesme me numrin më të madh të të prekurve më Cocid-19 në Berat. Nxënësit dhe mësuesit e këtij gjimnazi prej më shumë se 4-javësh kanë qenë të ekspozuar ndaj këtij virusi, pasi në çdo klasë ka pasur më shumë se 10 nxënës të infektuar, ndërkohë që të infektuar janë regjistruar edhe në radhët e mësuesve.
Situata e rënduar në këtë shkollë solli edhe mbylljen e 6 klasave, dezinfektimin e ambienteve të brendshme të shkollës dhe karantinimin e dhjetëra nxënësve. Drejtori dhe mësuesi i frëngjishtes, Llazar Palla do të përcillet nga familjarët e miqtë për në banesën e tij të fundit mesditën e sotme.
Discussion about this post