Shqiptari i shumëkërkuar nga policia italiane, është arrestuar në Dubai. Bëhet fjalë për Dorian Petokun, një trafikant i njohur droge, eksponent kryesor i krimit shqiptaro-romak dhe tashmë i përfshirë në listën e “te arratisurve të rrezikshëm”.
Petoku është arrestuar në Dubai nga Policia e Emirateve të bashkuara Arabe në bashkëpunim edhe me Guardia di Finanza, shkruan La Republicca.
“Nëse seriali ‘Narcos’ do të vendosej në Romë, Dorian Petoku do të kishte një rol kryesor”, shkruan gazeta italiane.
Shqiptari ishte strehuar në Dubai pasi ishte arratisur në dhjetor 2023 nga qendra rehabilituese në Nola të Napolit, ku ishte transferuar me një certifikatë mjekësore.
34-vjeçari shqiptar ishte mik i Fabrizio Piscitelli, me pseudonimin “Diabolik”, i cili u vra gjatë një prite që iu bë në vitin 2019 dhe kishte marrëdhënie me Salvatore Casamonica, kreun e klanit që kontrollon Romën Lindore. Petoku ishte dënuar me 12 vite burg si pjesë e një organizate kriminale.
I rritur në Lezhë, Petoku filloi të fitonte përvojë në botën e trafikut të armëve, drogës dhe qenieve njerëzore përpara se të zbarkonte në Romë, në Ponte Milvio. Kushëriri i bosit shqiptar të drogës, Arben Zogu, me kalimin e viteve fitoi gjithnjë e më shumë rëndësi në botën e krimit të kryeqytetit italian.
Ai u bë i njohur në një foto të realizuar më 13 dhjetor 2017 në restorantin ‘L’Oliveto’ në Grottaferrata. Janë katër burra në tavolinë. Njëri është “Francezi”, një i infiltruar, në krah të tij është Salvatore Casamonica dhe përballë tij “Diabolik”, Piscitelli dhe Dorian Petoku.
Sipas hetimeve, temë kryesore e bisedës ishte një armëpushim në konfliktin që kishte shpërthyer mes familjeve Esposito dhe Spada.
Jo vetëm kaq, Piscitelli, Casamonica dhe Petoku po planifikonin të transportonin edhe një sasi të madhe droge nga Amerika e Jugut. Operacioni i quajtur “Brazili” përfshite mbërritjen në Itali të 7 tonëve kokainë të fshehur në çantat e një ekipi futbolli të të rinjve.
Discussion about this post