Policia e Cërrikut ka arrestuar me qëllim ekstradimi një person të akuzuar nga Gjykata e Pejës, për veprimtari kriminale në fushën e narkotikëve. Në pranga u vu Armando Saliu, i shpallur në kërkim në lidhje me sekuestrimin e 1 ton kanabis në Pejë.
“Si rezultat i shkëmbimit të informacioneve dhe koordinimit të punës, ndërmjet Komisariatit të Policisë Cërrik dhe agjencive ligjzbatuese në Kosovë, u mundësua kapja dhe arrestimi, me qëllim ekstradimin në Kosovë, i shtetasit të shpallur në kërkim ndërkombëtar A. S., 33 vjeç, banues në Cërrik”, njoftoi policia.
“Gjykata Themelore e Pejës i ka caktuar këtij shtetasi, masën e sigurisë ‘Arrest në burg’, për veprat penale ‘Kultivimi i bimëve të hashashit, shkurres së kokainës ose bimëve të kanabisit’ dhe ‘Blerja, posedimi dhe shitja e paautorizuar e narkotikëve, substancave psikotrope dhe analoge’, parashikuar nga Kodi Penal i Republikës së Kosovës”, njoftoi policia.
Discussion about this post