Policia ka arrestuar reperin Rigels Rajku, të njohur ndryshe si Noizy. Sipas burimeve policore, ai është arrestuar në Kune të Shëngjinit teksa po shkonte për të kënduar në një klub nate. Noizy ishte i kërkuar nga Policia e Kosovës. Bashkë me të është arrestuar edhe Bahtjar Bajraktari, DJ i tij i njohur si Crax.
Vepra penale për të cilën akuzohet është lëndimi i rëndë trupor. Të dy akuzohen se rrahën më 2 gusht në Pejë personazhin e TikTok-ut, Medi Isenin.
Kapja dhe arrestimi i Noizy-t dhe Bahtjar Bajraktarit është bërë me qëllim ekstradimin në Kosovë. Policia e Kosovës ka shpallur në kërkim edhe Stresin, i cili akuzohet gjithashtu i përfshirë në ngjarje.
“Nga Drejtoria e Forcës së Posaçame Operacionale, Sektori për Kërkimin, Njësia ‘FAST Albania’ në Departamentin e Policisë Kriminale në PSH, është marrë informacion nga FAST Kosova, për 2 shtetas të kërkuar për llogari të Kosovës, që mund të fshiheshin në Shqipëri. Menjëherë, FAST Albania, bazuar në inteligjencën policore, bëri të mundur lokalizimin e 2 të kërkuarve, dhe në kuadër të operacionit policor ‘Fast’, kapi në Lezhë dhe arrestoi 2 shtetasit e shpallur në kërkim nga Policia e Kosovës, konkretisht shtetasin R.R., nga Durrësi, dhe shtetasin B.B., nga Prishtina. Kapja dhe arrestimi i tyre u bënë me qëllim ekstradimin në Kosovë”, njoftoi policia.
Ndërkohë, Noizy dhe DJ. Crax, në reagimet e tyre në rrjetet sociale për këtë ngjarje, mohojnë të jenë përfshirë në këtë sherr.
Discussion about this post