Një 30-vjeçar me banim në Kavajë është arrestuar nga policia lokale pasi akuzohet për 6 vjedhje.
“Shërbimet e Komisariatit të Policisë Kavajë, nga kryerja e veprimeve hetimore të iniciuara nga denoncimet e qytetarëve të ndryshëm për raste vjedhjesh, organizuan dhe finalizuan operacionin policor të koduar ‘The last’, në kuadër të të cilit u vu në pranga shtetasi: Xh. K., 30 vjeç, banues në Kavajë, për veprën penale ‘Vjedhja’“, njoftoi policia.
Nga tërësia e veprimeve hetimore, sipas bluve, rezultoi se në kohë dhe në vende të ndryshme, 30-vjeçari ka kryer një sërë vjedhjesh, 6 prej të cilave janë zbardhur dhe dokumentuar me prova ligjore. Prej muajit gusht 2022 deri në momentin që u kap në flagrancë, nga shërbimet e Seksionit për Hetimin e Krimeve të Komisariatit të Policisë Kavajë, ky shtetas ka vjedhur 2 biçikleta, si dhe sende të ndryshme në 2 banesa dhe në 2 biznese, në Kavajë.
“Në bashkëpunim me Prokurorinë, vijon puna për dokumentimin e vjedhjeve të tjera që mund të jenë kryer nga ky shtetas. Materialet procedurale i kaluan Prokurorisë pranë Gjykatës së Rrethit Gjyqësor Kavajë, për veprime të mëtejshme”, mbyllet njoftimi.
Discussion about this post