Një shqiptar, i cili ishte shpallur në kërkim për grabitje nga autoritetet italiane, është arrestuar në kufirin slloveno-italian. Shqiptari ishte arratisur prej tre vitesh dhe për t’i shpëtuar kapjes kishte marrë mbiemrin e gruas së tij.
Shqiptari, 40 vjeçar u arrestua në kufirin shtetëror midis Sllovenisë dhe Italisë në Basovizza, në komunën e Triestes.
Hektor Shala, banues në Castelletto Sopra-Ticino, ishte larguar nga arresti shtëpiak gjatë vuajtjes së dënimit për një grabitje në postën e Meinës, e ndodhur në vitin 2013.
Ai ishte në kërkim për tre vjet pasi ishte dënuar me një vit e tetë muaj për krimin e kryer në provincën e Novarës dhjetë vjet më parë. 40-vjeçari, me precedentë penalë, ishte kthyer në vendlindje ku ishte martuar për t’i shpëtuar kontrolleve dhe ligji e lejon burrin, nëpërmjet martesës, të marrë mbiemrin e gruas, raportuan mediat lokale.
Prandaj mbiemri i gruas figuronte në dokumente. Kështu ai mendoi se mund të kthehej lehtësisht në Itali, duke pasur një identitet të ri. Megjithatë, policia e ndaloi dhe pas identifikimit në kazermë, u arrestua dhe u dërgua në burgun e Triestes.
Discussion about this post