Policia e Shtetit ka vënë në pranga dy shtetas të shpallur në kërkim për rrëmbimin dhe vrasjen e 28-vjeçarit Renis Dobra në zonën e Ulzës, ngjarje e ndodhur mbrëmjen e 8 korrikut.
Të arrestuarit janë Kristi Bushgjoka dhe Aleksandër Bushgjoka, të cilëve u ishin lëshuar urdhra ndalimi, ndërsa më herët për këtë krim të rëndë u arrestuan edhe Petrit Çakrri dhe Fation Bushgjokaj.
Sipas hetimeve, tre vëllezërit Bushgjokaj nga Tropoja, që jetonin në Kamëz, dhe i dyshuari tjetër Çakrri, kishin marrë makina me qira në Tiranë disa ditë para ngjarjes, duke i ndërruar disa herë për të humbur gjurmët. Gjithashtu, ata tentuan të çaktivizonin pajisjet GPS të automjeteve, por pa sukses.
Grupi i dyshuar kishte ndjekur për tre ditë me radhë lëvizjet e Renis Dobrës në Burrel, derisa më 8 korrik e rrëmbyen, e mbytën me litar dhe më pas trupin e hodhën në liqenin e Shkopetit.
Njëri prej vëllezërve dyshohet se ka ndihmuar të tjerët të largohen drejt Kosovës pas krimit, ndërsa dy të tjerët akuzohen se kanë marrë pjesë drejtpërdrejt në rrëmbimin dhe vrasjen.
Discussion about this post