Qeveria ka përgatitur listën e re të diplomatëve që me nisjen e sesionit të ri parlamentar në vjeshtë do të diskutohen nga Komisioni i Politikës së Jashtme dhe më pas i takon Presidentit të dekretojë emërimin e tyre.
Në listë janë 12 emra, një pjesë e të cilëve diplomatë karriere dhe të tjerë që hyjnë rishtas në shërbimin diplomatik.
Mes emrave të propozuar është edhe ai i Petrit Malaj, aktor i njohur, pedagog në Universitetin e Arteve dhe ish-kandidat i PS-së për deputet, por pa mundur të fitojë mandatin në Qarkun e Kukësit.
Malaj është propozuar si ambassador i Shqipërisë në Kosovë, duke zëvendësuar kështu Qemal Minxhozin. Pa një eksperiencë në fushën e diplomacisë, Kryeministri Edi Rama duket se ka vendosur që në Prishtinë të delegojë një emër të njohur, figurë të dashur për publikun për shkak të roleve që ka luajtur në kinematografi, ndoshta një njohës të shkëlqyer të kulturës dhe artit, por zero eksperiencë në diplomaci.
Emërimi i Malajt si ambasador në Kosovë propozohet në një kohë kur raportet mes Kryeministrit Edi Rama dhe homologut të tij Albin Kurti janë pothuajse të “ngrira”. Ndoshta me situatat që po kalon Prishtina, tensionet në Veriun e Kosovës dhe presionin ndërkombëtar ndaj Qeverisë Kurti, të paktën qeveria e Tiranës mund të kishte emëruar një diplomat karriere, që mund të shërbente jo thjesht e vetëm në rolin mes dy vendeve, por të ishte një suport për Prishtinën.
Dhe në anën tjetër ka propozuar që ambasador i Shqipërisë në Beograd të jetë Bardhyl Canaj, një diplomat karriere që ka shërbyer në trupin diplomatik dhe aktualisht është ambasador i Shqipërisë në Izrael. Canaj ndoshta është diplomati me karrierën më të gjatë dhe eksperiencën më të madhe në diplomaci, krahasuar me ambasadorët e Shqipërisë në vendet e Rajonit, çka duket se Qeveria Rama e ka menduar mirë emërimin e tij në Beograd.
Discussion about this post