Pas dorëheqjes së Ani Dyrmishit, nga posti si drejtor i hekurudhës shqiptare, në krye të detyrës është emëruar Gentjan Liko.
Mësohet se Liko ka marrë detyrën ditën e sotme. Më parë ai ka mbajtur postin e nënkryetarit të bordit dhe sekretarit në ministrinë e Telekomunikacionit.
Kujtojmë që Ani Dyrmishi ka dhënë dorëheqjen nga detyra e tij për arsye personale në datën 6 prill. Dyrmishi u emërua në krye të hekurudhës shqiptare nga viti 2018. Ai më herë ka qenë drejtori i Hipotekës së Durrësit dhe më pas është emëruar drejtori i Hekurudhës Shqiptare, post që e mbante deri sot.
Theksojmë se Dyrmishi u largua nga Hipoteka e Durrësit pak pas zgjedhjeve të 2017, kur kryeministri Rama u kërkoi të gjithë drejtorëve të jepnin dorëheqjen. Ai ishte pjesë e listës me 101 emra për të cilët sipas Ramës ka pasur ankesa nga qytetarët. Pra ishte pjesë e listës së zezë të Ramës, ku përfshiu zyrtarët e korruptuar në vend.
Në 19 nëntor të vitit 2018 u gjet një sasi tritoli në makinën e Ani Dyrmishit, koha kur mbante postin e drejtorit të Hekurudhës Shqiptare, por fatmirësisht ai e pikasi në kohë dhe nuk pati të lënduar. Gjithashtu, ai është anëtar i Këshillit Bashkiak të Durrësit.
Discussion about this post