Kryeministri Edi Rama ka duartrokitur ditën e sotme investimet në fasadat e qyteteve, teksa u shpreh se janë të rëndësishme për zhvillimin dhe rijetëzimin e tyre, në një kohë që këto para mund të investohen në politika sociale për lehtësimin e jetesës së qytetarëve.
Nga Gjirokastra, kreu i qeverisë theksoi se po të mos ishin kaq të rëndësishme fasadat, “s’kishte pse kriheshin gratë në floktore 2 herë në javë”, ndërsa i tha qytetarëve të mos thonë se s’kanë bukë, pasi sipas tij fasadat sjellim kushte më të mira.
”Ndihesh i lumtur që në vendin tënd njerëzit po shkojnë ndryshe dhe po bëjnë ndryshe, vende të bukura dhe të varfra kam parë. Por një vend të pistë dhe të pasur nuk kam parë. Mos u merrni me fasada “se s’kemi bukë”, është dritëshkurtësi. Ato fasadat sjellin më shumë bukë, janë hallkat e zinxhirit që çon deri tek buka e atyre që punësohen. Shumë e thjeshtë, si do vinin nga Greqia në Gjirokastër për të bërë turizëm, duke parë plehrat e gropat. Duke parë rijetëzimin e kthimin e një dinjiteti. Po të ishte fasada kaq e parëndësishme s’kishte pse kriheshin gratë në floktore 2 herë në javë, dilnin të shpupuritura, as nuk lyheshin e as nuk kriheshin, as visheshin. Edhe burrat jo e jo, mbanin gjethen këtu përpara, dilnin e vazhdonin muhabetet, thoshim nuk po blejmë rrobat po blejmë bukë, me gjithë gjethe. Si qenka kjo, kaq të prapambetur janë, të zhytur në patakun e injorancës janë, e kaq të poshtër. Është edhe ligësi e madhe që ushqehet nga ligësia, verbëria, inati dhe urrejtja. Deri në pikën që edhe luftën bërthamore mund ta ëndërrojnë vetëm për të mos parë mirë këtu. por shyqyr do shkojnë edhe më mirë”, tha Rama.
Discussion about this post