Kuvendi është mbledhur sërish ditën e sotme ku po vijojnë diskutimet për paketën e re fiskale dhe projekt-buxhetin e vitit 2022, që është miratuar parimisht në komisionet parlamentare. Në një ndër seancat më të rëndësishme të vitit, kryeministri Edi Rama dhe kreu i opozitës, Lulzim Basha nuk janë të pranishëm në Kuvend.
Ndonëse mund të jenë mjaftuar me debatet apo përplasjet gjatë seancës së djeshme, të dy liderët e partive politike, duhet të ishin në parlament për të justifikuar punën e tyre dhe votat e qytetarëve. Seanca e ditës së hënë u shoqërua me tona të larta zëri dhe akuza mes qeverisë dhe opozitës, duke mos sjellë asgjë të re në klimën politike të vendit.
Kryeministri Rama tha se ky është një buxhet që nuk ka lënë asnjë sektor apo shtresë sociale pa mbështetje, ndërsa Basha akuzoi qeverinë se e ka vënë buxhetin 2022 në shërbim të klientëve të saj. Diskutimet në seancën maratonë ditën e djeshme u mbyllën pas gati 11 orësh, ndërsa po vijon edhe ditën e sotme, ku në përfundim pritet miratimi i projekt-buxhetit në masën 537 miliardë lekë.
Discussion about this post