Skuadra e Egnatias vijon stërvitjen, në pritje të një prej miqësoreve historike ndaj Interit të Milanos, që do ta zhvillojë më 13 gusht, ora 20:00 në stadiumin “Paolo Maza” në Ferrara të Italisë.
Situata në kampin rrogozhinas është e qetë dhe natyrisht e mbushur me padurim deri në testin e luksit që do të kenë ndaj zikaltërve, që janë nënkampionët në fuqi të Europës.
Në ndryshim nga ditët e mëparshme, dje në skuadrën e drejtuar nga Edlir Tetova nuk ka pasur lëvizje në merkato. Deri më tani janë afruar Stivian Janku, Albano Aleksi, Ilir Dabjani, Vusal Isgandarli, Edison Ndreca, Alesandro Ahmetaj, Loti Celina dhe i rikthyer nga huazimi Redon Mihana.
Janku, Dabjani, Ndreca, Ahmetaj dhe Celina nuk kanë debutuar ende me fanellën e Egnatias, pasi nuk mundën dot të aktivizoheshin në dy ndeshjet kundër Araratit për turin e parë të Ligës së Konferencës. Ndërkohë, të larguar nga skuadra e sezonit të kaluar janë Sodik Atanda, Eduards Emsis, Gersi Diamanti, Majkëll Agbekpornu, Bruno Puja, Santos Xhekson Kenio, Xhejms Ayinde, Alesandro Kacbufi dhe Flavio Meçja.
Gjasat janë me largimet klubi të ketë mbaruar punë, ndërsa ndryshon situata sa i përket afrimeve, pasi deri në fund të merkatos, mund të ketë edhe një goditje tjetër.
Gjasat janë për një numër 10, por gjithnjë nëse bëhet fjalë për një lojtar që mund të bëjë diferencën, pasi në të kundërt, klubi s’do lëvizë. Kjo do të shikohet më mirë në ditët në vijim, paçka se drejtuesit kanë shqyrtuar disa alternativa këtë periudhë, por që nuk janë bindur. Ndërkohë, nesër në orën 18:00 Egnatia do të luajë një ndeshje miqësore në Rrogozhinë kundër Laçit, ndërsa të shtunën do të presë Bylisin./PanoramaSport
Discussion about this post