Kontrollet blic në Tiranë kanë vënë në pranga një punonjës lokali, ndërsa kanë shpallur në kërkim pronarin. Policia njofton se bëhet fjalë për personin e identifikuar me iniciale E. X, 47 vjeç (punonjës), si dhe u bë shpallja në kërkim e B. H, 36 vjeç (pronari i lokalit).
Policia jep detaje se personat në fjalë kanë bashkëpunuar me veprimtarinë e kundërligjshme të ushtrimit të aktivitetit në fushën e lojërave të fatit, me anë të aplikacioneve në aparatet celulare, tableta, kompjuterë si dhe duke përshtatur ambiente për lojëra fati.
Gjatë kontrollit në lokal, shërbimet e Policisë sekuestruan 4 makineri për vendosjen e xhetonave, një shumë e konsiderueshme parash, disa kompjuterë dhe sende të tjera të kundërligjshme.
Vijon puna për kapjen e personit në kërkim, si dhe të personave të tjerë të përfshirë në organizimin e kësaj veprimtarie kriminale.
Ndërsa, materialet i kaluan Prokurorisë së Rrethit Gjyqësor Tiranë, për veprat penale “Organizim i lotarive të palejuara, ”Vënia në dispozicion e lokaleve për lojra të palejuara,” “Fshehje të ardhurash” dhe “Mospagim taksash dhe tatimesh”.
