Negociatat me BE, Këlliçi: Ja pse Edi Rama gëzohet kur nuk hapen

Deputeti demokrat Belind Këlliçi ka thënë se personi i fundit i interesuar në Shqipëri për hapjen e negociatave është Edi Rama.

Këlliçi i ftuar në emisionin “Zonë e Lirë” tha se mos hapja e negociatave nuk ka lidhje me qëndrimin apo veton e Bullgarisë, por me kushtet të cilat nuk i ka përmbushur Edi Rama.

“Ai organizon zgjedhje me patronazhistët, me blerjen e votave, me shkeljen e standardeve zgjedhore dhe ky është fakt, e keni në çdo raport ndërkombëtar”, tha Këlliçi.

Sipas tij, kjo është një nga arsyet pse Rama nuk do hapjen e negociatave dhe ndjehet mirë, pasi në të kundërt duhet të përmbushë standardin e zgjedhjeve të lira dhe të ndershme.

Një tjetër shkak për mos hapjen e negociatave, deputeti i PD, përmendi nivelin e lartë të korrupsionit, të shtrirë në çdo qelizë të administratës, por edhe përmes tenderave dhe koncensioneve korruptive.