Kryeministri Edi Rama tha se nuk ka nevojë për asnjë negociatë me opozitën lidhur me komisionet hetimore, pasi ato janë një e drejtë e saj, nëse janë sipas kornizës kushtetuese.
Nga Shkodra ku zhvilloi takimin e përbashkët mes të zgjedhurve vendorë dhe Qeverisë, Rama në një konferencë për mediat, u pyet lidhur me negociatat me opozitën, sikundër është paralajmëruar në media. Gjithashtu Rama u shpreh i prerë lidhur me reformën zgjedhore, kur tha se nëse s’ka vota për të miratuar ndryshimet, atëherë nuk ka, dhe në zgjedhje do të shkohet me Kodin aktual Zgjedhor.
“Unë nuk arrij ta kuptoj nëse ata të cilët komentojnë, ne e kemi thënë përpara, nuk kemi refuzuar dhe nuk kemi shkelur asnjë të drejtë për ngritjen e komisioneve hetimore. Kemi refuzuar të votojmë inisiativa që shkelin kornizën e mirëpërcaktuar nga vendimet e Gjykatës Kushtetuese. E kemi thënë që kjo nuk është çështje marrëveshje. Është çështje të drejtash.
Opozita ka të drejtë të ngrenë një komision, por të jetë brenda kornizës të përcaktuar nga kornizat e Gjykatës Kushtetuese. S’ka nevojë për negociata.
Diskutimet bëhen në komision. Kanë kaluar disa muaj që përsa i përket komisionit të reformës zgjedhore është një praktikë që ka dalë nga konteksti i kohës që jetojmë.
Nëse do ketë të tjerë të lenë propozimet t’i lënë, nëse s’ka vota s’ka vota”, tha Rama.
Discussion about this post