Negociatat PS-Rithemelim, Alibeaj i zhgënjyer: Pazar në kurriz të…

Sekretari i Përgjithshëm i PD-së zyrtare, Enkelejd Alibeaj ka reaguar në lidhje me takimin e zhvilluar mes kryetarëve të grupeve parlamentare dhe kryetares së Kuvendit Lindita Nikolla, për të negociuar rikthimin e jetës parlamentare.

Alibeaj shprehet i zhgënjyer, pasi në këtë takim nuk kishte përfaqësues të Partisë Demokratike të vulës, dhe pjesëmarrjen e Gazmend Bardhit, ndonëse nuk e përmend me emër, është munduar ta etiketojë si një njeri të emëruar nga Edi Rama.

“Dy sqarime që publiku ka nevojë t’i dijë lidhur me negociata sekrete apo marrëveshje okulte të përfolura në media:

1-PS duhet të sqarojë nëse ka vendosur të bëjë pazar për Reformën Zgjedhore. Në media referuar burimeve nga PS dhe grupi i Sali Berishës, është bërë e ditur se ka një dakordësi për të dështuar Komisionin e Reformës Zgjedhore në mënyrë që çështja të kalojë në Komisionin e Ligjeve ku socialistët kanë vendimarrjen me shumicë votash e sidomos ku opozitës i mohohet e drejta e Vetos, si garanci që PS të mos bëjë ligj zgjedhor të njëanëshëm duke peshkuar vota opozitare. Dihet se ata janë kundër votës së diasporës, votimit elektronik, listave të hapura, një zone elektorale.

Nëse kjo është e vërtetë ky është një pazar në kurriz të shqiptarëve dhe për interesa të dy individëve që duan të mbajnë peng Shqipërinë, Rama dhe Berisha.

2- Në emër të PD nuk mund të flasë asnjë i emëruar apo i dëshiruar i Edi Ramës”, thuhet në reagimin e Aliabeajt.

Reagimi i Partisë Demokratike zyrtare, drejtuar nga Lulzim Basha vjen pas lajmit se kryetarja e Kuvendit, Lindita Nikolla ka mbledhur këtë javë krerët e grupeve parlamentare për zgjidhur ngërçin politik të krijuar në Kuvedin e Shqipërisë dhe në Komisionet Parlamentare.

Në takim, i cili ka zgjatur mbi 3 orë, kanë marrë pjese Bledi Çuçi, Gazment Bardhi, Dashamir Shehi, Mesila Doda.

Nikolla u ka kërkuar kryetareve të grupeve parlamentare që të gjejnë një zgjidhje për krizën parlamentare.

Takimi është konfirmuar edhe nga Dashamir Shehi, i cili ka qenë prezent në takim.

Burime bëjnë me dije, se kreu i Grupit Parlamentar të PD-se, Gazment Bardhi ka kërkuar ngritjen e disa komisioneve hetimore parlamentare, bashkëkryetarin e reformës zgjedhore, si dhe të merren në konsideratë nismat ligjore të propozuara në Kuvend nga deputetët e opozitës.