Kryeministri Rama ka publikuar një video nga dita e tretë e Samitit në Madrid, teksa bisedon me liderët e vendeve anëtare, ndërkohë që ka paralajmëruar një lajm të mirë.
“Mbase sot lajmi i mirë…”, shkruan Kryeministri krah videos, ku duket duke biseduar veçanërisht me Presidentin Bullgar Rumen Radev.
Kujtojmë se prej ditës kur Parlamenti i Bullgarisë ka hequr veton për Maqedoninë e Veriut pritet nga momenti në moment një vendim I BE për të përcaktuar një datë për konferencën e parë ndërqeveritare me Shqipërinë dhe fqinjin tonë lindor.
Kujtojmë se në samitin e fundit, teksa i hapi rrugë Ukrainës për anëtarësim, Bashkimi Evropian nuk dha dritë jeshile për dy vendet e bllokuara nga vetoja bullgare. Samiti i liderëve të Bashkimit Evropian me ata të Ballkanit Perëndimor i mbajtur të enjten e 23 qershorit nuk dha asnjë rezultat pozitiv, ashtu si kurse edhe pritej.Por heqja e vetos në një vendim të Parlamentit bullgar një ditë më pas shtoi shpresat për 2 vendet ballkanike. Tashmë të gjithë janë me sytë nga Brukseli, nëse do ta kemi apo jo sot një vendim historik për përcaktimin e një date për Konferencën e parë Ndërqeveritare.
I qartë ishte mesazhi i 3 liderëve të Ballkanit Perëndimor, Kryeministrit Edi Rama, presidentit serb Aleksandër Vuçiç dhe kryeministrit maqedonas Dimitar Kovacevski, pas zhgënjimit nga Bashkimi Evropian i cili edhe këtë herë nuk i çeli negociatat me Shqipërinë dhe Maqedoninë e Veriut. Të tre dolën në një konferencë të përbashkët për mediat për të shprehur zhgënjimin dhe mospajtimin pas vetos bullgare por edhe për të shpalosur unitetin si ‘Ballkan i Hapur’.
Discussion about this post