Edison Memolla, kryebashkiaku i Rrogozhinës, ndodhet nën hetim nga SPAK që prej tetorit të vitit të shkuar, kur u mor i pandehur. Por, ndërsa hetohet akuza, për çudi shtohen abuzime të reja. Memolla nuk e vret mendjen fare, vazhdon të zhvillojë tenderë pa garë. Më datë 26 shkurt 2024, kryetari Memolla ka hapur një tender me objekt ‘PROJEKTIM DIGA BASHKIA RROGOZHINE’, ku do të shpenzohen 80 milionë lekë.
Këtë fond prej 80 milionë lekësh, kryetari Memolla kërkon ta ndajë për miqtë e tij. Gara për tenderin është mbyllur më datë 8 mars 2024 dhe deri në atë kohë kishin paraqitur oferta 3 kompani. Gjithsesi, ditën e zhvillimit të tenderit mbeti në garë vetëm firma HYDROWATER-ALBANIA, edhe pse kishte ofertën më të shtrenjtë. Ndërkohë dy firmat e tjera u skualifikuan nga gara pa ndonjë arsye të fortë.
E Mbetur pa asnjë konkurrent përballë, me ofertën 73 milionë lekë, firma HYDROWATER-ALBANIA nënshkroi kontratën me Bashkinë Rrogozhinë. Për këtë Open Data e ka vlerësuar prokurimin me ‘Flamurin e Kuq’, i cili valëvitet për të theksuar abuzimet e Memollës dhe për të shënjuar riskun e korrupsionit.
Kujtojmë se kryetari Memolla akuzohej edhe për korrupsion gjatë zgjedhjeve. Në mars të këtij viti, SPAK çeli një tjetër çështje penale ndaj kryebashkiakut socialist të Rrogozhinës, Edison Memolla. Krahas akuzës zyrtare për korrupsion në zgjedhje, i zgjedhuri vendor po hetohet për korrupsion me fondet e rindërtimit, pas tërmetit tragjik të 26 nëntorit 2019.
Çështja penale ka nisur pas një kallëzimi të opozitës, e cila pretendon se Memolla ka abuzuar me dëmshpërblimet për banorët e prekur nga tërmeti. Nga hetimet e prokurorisë së posaçme, janë ngritur dyshime se Memolla u ka dhënë fonde të afërmve të tij në vlera të konsiderueshme, si dhe ka dhënë dëmshpërblime dy herë për të njëjtën banesë të dëmtuar nga tërmeti. Për momentin prokurorët e SPAK janë duke sekuestruar dokumentet dhe kanë nisur marrjen në pyetjeve të personave që mund të japin informacion në lidhje me këtë çështje.
Sipas ligjit, për zyrtarët e dyshuar për korrupsion zhvillohet edhe hetim pasuror, ndaj edhe pasuritë e Memollës, janë duke kaluar në sitën e prokurorëve të posaçëm.
Këta të fundit janë duke hetuar edhe rreth aktiviteti të një të afërmi të kryebashkiakut, i cili dyshohet të jetë përfshirë në krim të organizuar në Itali dhe që dyshohet se ka pastruar para në Shqipëri. Aktualisht, Edison Memolla është duke u përballur me Gjykatën e Posaçme me akuzat për korrupsion në zgjidhje. Memolla ndërhynte pranë OSHEE që të mos u ndërpritej energjia elektrike debitorëve, me qëllim që ata ta votonin në zgjedhjet e pjesshme vendore të 6 marsit 2022 ku ai kandidonte nën siglën e socialistëve, ku edhe rezultoi fitues. Të pandehur për korrupsion bashkë me kryebashkiakun janë edhe 3 persona të tjerë.
Pra, po të shohësh problemet e rreshtuara më sipër, këto tenderat Memolla i ka si kafe mëngjesi.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016
Discussion about this post