Zbardhen të tjera detaje mbi arrestimin e Artion Taçit, drejtorit të zjarrfikëses në Bashkinë Cërrik. Sipas raportimeve, mësohet se operacioni i arrestimit u finalizua pas një periudhe 5 mujore, ku ndaj Taçit janë aplikuar edhe metodat e përgjimit dhe vëzhgimit.
Pikërisht provat e siguruara nga përgjimi, por edhe vëzhgimi, kanë shërbyer për të çuar deri në fund hetimin dhe arrestimin e tij, ndërsa dyshohet se ai ka përdorur postin e tij, për të mbledhur vota në favor të një subjekti politik.
Dyshohet se ai ka kontaktuar me mbi 40 persona, të cilëve iu ka ofruar ndihmën për të shmangur detyrimet ligjore që ata kishin, në lidhje me masat e sigurisë për mbrojtjen nga zjarri në bizneset e tyre.
Sipas raportimeve, hetimet kanë nisur pas denoncimit të një qytetari.
Bashkë me Taçin janë arrestuar edhe dy vartësit e tij Armand Gjoka dhe Adnand Xhelili, përgjegjësi i OSHEE Cërrik, Alban Shima dhe punonjësi i bashkisë së Cërrikut, Agiano Dinoshi me detyrë specialist në zyrën e taksave.
Ndaj Taçit janë ngritur akuzat për “ushtrim të ndikimit të paligjshëm ndaj personave që ushtrojnë funksione publike”, dhe “përdorimi i funksionit publik për veprimtari politike ose zgjedhore”.
Dy vartësit e tij akuzohen për “përdorim të funksionit publik për veprimtari politike ose zgjedhore”. Ndërsa punonjësi i bashkisë është arrestuar për lëshim të vërtetimeve false për disa biznese gjatë periudhës së fushatës zgjedhore të 14 majit. Po për këtë vepër penale është shpallur në kërkim edhe një 64 vjecar.
Për të pestë të arrestuarit Gjykata e Shkallës së Parë Elbasan ka vendosur masën e sigurisë “Arrest në burg”. Dosja pritet t’i kalojë SPAK.
Discussion about this post