Punimet dhe vendimet e Kuvendit të thirrur nga Berisha, i cili u realizua ditën e shtunë në ambientet e stadiumit kombëtar “Air Albania” janë nul për shkak të statutit të Partisë Demokratike. Kjo për faktin e thjeshtë se ndonëse në Statutin e PD shkruhet se Kuvendi Kombëtar mund të mblidhet kur e kërkon 1/4 e anëtarëve të PD, ndër të tjera thuhet se përbërja e komisionit që do të drejtojë punimet, duhet të zgjidhet nga kryetari i partisë.
“Kuvendi Kombëtar mblidhet si rregull çdo katër vjet. Vendimin për mbledhjen e Kuvendit Kombëtar e merr Këshilli Kombëtar ose Kryesia e PDSH-së, me propozim të Kryetarit të PDSH-së. Kuvendi mund të mblidhet edhe kur e kërkojnë 1/4 e anëtarëve të PDSH-së ose 1/4 e anëtarëve të Kuvendit Kombëtar. Data e zhvillimit të Kuvendit dhe rendi i ditës njoftohen të paktën një muaj përpara ditës së parë të Kuvendit. Punimet e Kuvendit drejtohen nga një Komision i përbërë nga 5 anëtarë, i cili zgjidhet në fillim të Punimeve të tij, me propozimin e Kryetarit të Partisë”, shkruhet në statutin e PD.
Pra në statut është e qartë se Kryetari i Partisë Demokratike, Lulzim Basha duhet të propozonte komisionin me 5 anëtarë. Por, ndryshe u vepruan në Kuvendin e Berishës, pasi 5 anëtarët e Komisionit të Verifikimit, Albana Vokshi, Ervin Minarolli, Ivi Kaso, Edmond Spaho dhe Belind Këlliçi u propozuan si emra nga kreu i Këshillit Kombëtar të PD, Edi Paloka dhe u miratuan nga të pranishmit në stadium, për të cilët Berisha deklaron se janë delegatë, por që nuk u bë transparencë për ta.
Madje, në një tabelë elektronike u shfaq numri i delegatëve që pretendohej se ishin të pranishëm, por nuk u nxorën emrat e tyre për tu bërë verifikimet e duhura nga të gjitha palët e interesuara, një transparencë e nevojshme sidomos në një përplasje të tillë, ku Berisha kërkon shkarkimin e kreut të Partisë Demokratike. Kësisoj, ky nen i Statutit të Partisë Demokratike bën nul vendimet e Kuvendit të Berishës, që nga shkarkimi i Bashës e deri tek i ashtuquajturi Komisionit i Rithemelimit me 29 anëtarë, duke hedhur poshtë legjitimitetin e tij dhe entuziazmin e madh të Berishës.
Discussion about this post