Nënkryetarja e Bashës nis sulmin ndaj Bardhit: Ka refuzuar çdo…

Mbështetës të Lulzim Bashës, i cili ka marrë drejtimin e PD-së zyrtare dhe së fundmi ka emëuar edhe ekipin drejtues të kësaj partie, vijojnë sulmet dhe akuzat ndaj Gazment Bardhit, i cili kryeson një tjetër grupim brenda demokratëve, që nuk njohin Bashën si kryetar.

Bardhi pak ditë më parë inicoi një takim mes deputetëve demokratë, ftesë që u refuzua nga mbështetësit e Lulzim Bashës, por u pranua nga grupimi që drejtohet nga Berisha. Kaq ka mjaftuar që Bardhi, kreu i Grupit Parlamentar të PD-së dhe Sekretar i Përgjithshëm, të spostohet nga të gjitha pozicionet drejtuese në partinë e Bashës.

Deputetja Oriola Pampuri, e cila është emëruar si nënkryetare nga Lulzim Basha, në një intervistë për Euronews Albania, u shpreh se Bardhi ka bojkotuar çdo ftesë që i ka shkuar nga PD për të marrë pjesë në aktivitetet e partisë.

“Më e vështirë duhet të jetë situata për ata që kanë bërë një zgjedhje të tillë se sa brenda Grupit Parlamentar të PD-së.

Në fund Grupi Parlamentar i PD del nga zgjedhjet e viti 2021 dhe del si grupi më i madh parlamentar dhe i tillë mbetet deri në zgjedhjet e 2025,  pavarësisht lëvizjeve që mbeten në ndërgjegjen e secilit prej deputetëve.

Në momentin që ky Grup përmbush numrat e një grupi parlamentar, sigurisht mbetet në normën e grupit më të madh opozitar në Kuvend.

Ky është rregull dhe nuk e zhbëjmë dot. Unë nuk marrë ftesa personale për interesa personale. Unë marrë ftesa nga kreu i grupit parlamentar të PD sepse respektoj institucionin, ndërsa shoqërinë dhe miqësinë unë e zgjedh vetë.

E zgjedh vetë se më kë do të ha drekë dhe me kë do të pi kafe.

Sa i përket vendimeve politike, merrem me grupin parlamentar dhe kreu i grupit parlamentar ka detyrë të njoftojë dhe të vërë në dijeni të gjithë deputetët. Partia nuk funksionon si çetë shokësh. Bardhit i ka shkuar ftesë për të qenë pjesë e kryesisë, i ka shkuar ftesë për të qenë pjesë e grupit parlamentar, por nuk ka shkuar në asnjë aktivitet. Bardhi nuk ka qenë në asnjë mbledhje edhe pse mbante postin e Sekretarit të Përgjithshëm, postin e kryetarit të Grupit Parlamentar”, tha ai.