Presidenca ka hedhur poshtë të gjitha lajmet se një nëpunës i saj është përfshirë në veprimtari të paligjshme. Në një postim në Facebook, këshilltari i Ilir Metës, Tedi Blushi, ka thënë se lajmet që qarkullojnë në rrjet janë të pavërteta dhe dashakeqe. “Nuk ka asgjë të vërtetë në përmbajtjen e një “fake news” që prej disa javësh riqarkullohet në media, për gjoja nënkuptimin e përfshirjes së një nëpunësi të Institucionit të Presidentit të Republikës në veprimtari të paligjshme, gjoja sipas një raporti të SHISH, që është veçse një material promovues propagandistik për aktivitetin e tij, ku nuk përmendet kurrkund Presidenca dhe që ngjason me Revistën e Sigurimit të Shtetit “Në shërbim të popullit””, shkruan ai.
Duke marrë rastin konkret të gazetarit që publikoi i pari këtë lajm, Blushi shprehet se ai po përpiqet që të ngrejë një tymnajë në institucione dhe tregon mungesë profesionalizmi. “Sqarojmë opinionin publik se përpjekja e gazetarit E.Q për të ngritur një tymnajë mbi Institucionin e Presidentit të Republikës dhe vijimi i konsumimit të pretendimeve të ngjashme nga portalet më karagjoze në vend dhe më në mbrojtje të aferës së inceneratorëve, dëshmojnë për një mungesë të theksuar profesionalizmi dhe një tendencë bajate dashakeqe për disa klikime më shumë.
Të gjithë shqiptarët e dinë se ku punojnë spiunët dhe tradhëtarët e Shqipërisë dhe të kombit shqiptar”, tha Blushi, duke theksuar se askush nuk ka fakte për këtë.
Discussion about this post