Kryetari i PD, Sali Berisha, ka paralajmëruar se do të jetë i detyruar të bëjë publike kush fshihet pas publikimit të dokumenteve për faturat e paguara të hoteleve për ish ministrin Arben Ahmetaj, nëse ky i fundit nuk bën transparencë. Lidhur me intervistën e dhënë në media nga ish ministri, Berisha tha se “beteja është e ashpër, është personale midis Ramës dhe Arben Ahmetajt”.
“Arben Ahmetaj nuk ka firmosur për Tiranën, ka larë duart, shkruan aty, e kam lexuar unë atë shkresë, që ‘ky është një problem i qeverisë vendore’ dhe sipas tij ka bërë një seri vërejtjesh për këtë çështje, por prapë a mund të quhet i pafajshëm ai që sheh me sy krimin dhe nuk e denoncon?
Ahmetaj nuk ka firmosur për Tiranën, për Fierin duhet ta verifikoj, por për Tiranën jo.
Për Tiranën është njeriu që lan duart, por ministri s’mund të lajë duart, duhet të thoshte që kjo nuk mund të bëhet se është e kundraligjshme, e tani kërkon të fshihet pas asaj.
Të dy janë përgjegjës. Intervista e tij hodhi dritë të plotë mbi të vërtetat të cilat në këtë sallë, që nga 2014, i kanë denoncuar zyrtarë të PD, gazetarë.
Beteja është e ashpër, është personale midis Ramës dhe Arben Ahmetajt.
Edhe 2 vjet po të rrëmoni ju nuk mund të imagjinoni kush ia dha Adriatik Doçit faturat që i mohonte, faturat e hoteleve të Ahmetajt, që i mohonte.
Pra, nëse ai nuk e bën publik, do detyrohem t’i bëj publike. Ua them këtu sot. Po dole për të bërë transparencë, bëje të plotë se do detyrohem t’ia them këtu. Se këtu siç e shihni, personazhet në skenë janë qeveritarë mafiozë. Këta janë e keqja e vendit ndaj dhe ne do i denoncojmë”, theksoi Berisha.
Discussion about this post