Kryeministri Edi Rama ka treguar ditën e sotme se nesër do të ngrihet platforma për ‘Konsultimin e madh Kombëtar’. Këtë deklaratë ai e bëri pas takimit që zhvilloi me kabinetin për të analizuar 100 ditët e para të mandatit të tretë. Kujtojmë se, kjo platformë është prezantuar nga kryeministri përpara formimit të qeverisë së re, e cila synon që për vendimmarrjet e rëndësishme do merret edhe mendimi i qytetarëve.
“Nesër vendosim në qeveri Konsultimin e madh Kombëtar me shqiptarët për vendime të rëndësishme të vitit që po vjen dhe le ta dëgjojmë sa më shumë njëri-tjetrin, jashtë llogoreve të ngushta partiake e llogjeve të mëdha provinciale! Ata s’kanë ç’ humbin më ne s’kemi kohë për të humbur”, shkruan Rama.
Kryeministri nuk ka nguruar që të komentojë situatën në PD dhe luftën mes Sali Berishës dhe Lulzim Bashës. Për kreun e qeverisë, PD-ja ka hyrë në një vorbull marrëzie bravash. Mes ironie ai u shpreh se ‘kufomat grata-nongrata’ po përpiqen të bëjnë sikur duan të luftojnë korrupsionin e Vuçiçin, por sipas tij drejtësia e re ka filluar të japë rezultatet e para, sportelet do të mbyllen duke ulur kështu korrupsionin e ndërsa ekonomia ka filluar të lulëzojë pas pandemisë.
“S’kam ndërmend të merrem as me kufomat grata-nongrata as me dordolecët e papagallët grata e vinci (gërvisht e fito) që kanë hyrë në një vorbull marrëzie qesharake bravash, dyersh, kanalesh e portalesh, kinse po duan kush e kush të luftojë më fort regjimin, korrupsionin, Vuqiqin! Jam i inkurajuar që drejtësia e re po jep sinjale të qarta pa dallim ngjyrash, ekonomia po vijon ringjitjen pas pandemisë, sporteleve po u vjen fundi bashkë me vitin në ikje dhe më e mira është e gjitha përpara, duan s’duan humbësit fitimtarë të kuvendeve demokratike e mediatike”, shkruan Rama, duke thënë se do të injoroj çdo shpikje që bëhet ndaj qeverisë.
Discussion about this post