Nesër do të nisë sesioni i ri Parlamentar dhe PD do të shkojë sërish e përçarë. Për të dytin vit radhazi, ligjvënësit demokratë nuk po gjejnë gjuhën e përbashkët. Edhe pse një pjesë e mirë e deputetëve, ashtu edhe mazhoranca, njohin Alibeajn si kreun e grupit parlamentar të PD, deputetët e Berishës pritet të depozitojnë në Kuvendin e Shqipërisë një kërkesë për të njohur Luçiano Boçin.
Këtij grupimi, së fundmi i janë bashkuar edhe deputeti i Dibrës Xhelal Mziu dhe ai i Beratit Tomorr Alizoti. Këto probleme të vjetra të luftës së brendshme, kanë penguar PD të zhvillojë traditën e mbledhjes së grupit parlamentar në prag të nisjes së sesionit të ri. Deputetët e Alibeajt u mblodhën në një hotel të kryeqytetit për të diskutuar axhendën në prani të një gote vere, ndërsa Berisha zgjodhi që për aksionin opozitar, përfshirë edhe atë në parlament, të mblidhte vetëm kryesinë.
Discussion about this post