Kryeministri izraelit, Benjamin Netanyahu deklaroi sot qëllimin e tij për të marrë kontrollin e të gjithë Rripit të Gazës.
“Ne do të marrim kontrollin e të gjitha zonave të Rripit të Gazës”, tha ai në një video të publikuar në Telegram.
Më herët, burime qeveritare izraelite i thanë medias se Kabineti i Sigurisë kishte miratuar plane për të marrë kontrollin e plotë të Gazës dhe për të ruajtur një prani afatgjatë.
Plani thuhet se përfshin zhvendosjen e palestinezëve nga veriu i Gazës në jug.
Megjithatë, deri më tani, vetë Netanyahu duket se e ka lënë të hapur nëse Izraeli kishte ndërmend të pushtonte të gjithë rripin apo vetëm disa pjesë të tij.
Sugjerimi i një pushtimi të përhershëm ka tërhequr kritika të ashpra ndërkombëtare.
Ushtria izraelite tha dje në mbrëmje se ishte nisur një ofensivë e re e madhe – që synonte shkatërrimin e lëvizjes islamiste palestineze, Hamas dhe lirimin e të gjithë pengjeve të mbetura.
Sulmet ajrore janë përshkallëzuar që atëherë, së bashku me operacionet tokësore në shkallë të gjerë.
Disa politikanë të krahut të djathtë, po e nxisin Netanyahun të avancojë me ofensivën – duke rivendosur vendbanimet izraelite në Gazë, të cilat u shkatërruan pas tërheqjes së Izraelit në vitin 2005.
Në video, Netanyahu mbrojti gjithashtu njoftimin e tij – se Izraeli po planifikon të rifillojë shpërndarjen e ndihmës humanitare në Gazë.
“Vendimi – i cili është kritikuar nga disa aleatë politikë vendas – është i rëndësishëm për ruajtjen e mbështetjes ndërkombëtare”, tha ai.
“Për të përfunduar fitoren tonë, për të mposhtur Hamasin dhe për të liruar pengjet, nuk mund të arrijmë pikën e urisë”, tha ai.
Pas rënies së armëpushimit në Gazë në fillim të marsit, Izraeli ndaloi ndihmën humanitare në territorin e izoluar.
Ky veprim shkaktoi dënim të ashpër nga agjencitë e ndihmës, të cilat paralajmëruan për krizë urie, si dhe zhgënjim nga aleatët kryesorë, si Shtetet e Bashkuara të Amerikës.
Discussion about this post