Kupa e Botës në Katar po afrohet gjithnjë e më shumë dhe, siç ka ndodhur tani e tetë vite, në Brazil ka ardhur koha të flasim për Neymar. Në vitin 2014, “O Ney” ishte shpresa e madhe e Brazilit për kampionatin botëror në shtëpi, por dëmtimi në ndeshjen kundër Kolumbisë e fundosi atë dhe skuadrën, e cila në gjysmëfinalen e famshme ndaj Gjermanisë pësoi një disfatë 7-1, që hyri në historinë e kompeticionit.
Në vitin 2018, nga ana tjetër, pas paraqitjeve të shkëlqyera në grup dhe në 1/8 finale kundër Meksikës, erdhi ndeshja e keqe kundër Belgjikës në çerekfinale, ç’ka hapi gjyqin mediatik për numrin 10, duke akuzuar paksa nga të gjitha anët për simulime të tepërta për të mashtruar gjyqtarët.
Dhe duke qenë se traditat janë të rëndësishme, edhe një herë “O Ney” përfundoi në qendër të polemikave. Gjithë faji i zgjedhjeve presidenciale. Siç shpjegohet nga gazeta spanjolle “Sport”, me faktin se ka dalë hapur në favor të presidentit në largim Jair Bolsonaro, më pas i mundur në raundin elektoral nga rivali i tij Lula, Neymar ka thyer një ligj të pashkruar brenda dhomës së zhveshjes së Seleção.
Kush është pjesë e kombëtares braziliane nuk duhet të mbajë qëndrim për çështjet politike. Neymar e bëri këtë dhe në mënyrë të qartë, duke përdorur rrjetet sociale dhe popullaritetin e tij në përpjekje për të ndikuar në rizgjedhjen e Bolsonaro. Por as ky nuk është problemi.
Çështja është se në fushatën e tij, Neymar vendosi edhe kombëtaren në mes. Mes deklaratave të tij për zgjedhjet, sulmuesi shpjegoi se do të kishte dashur ta festonte rizgjedhjen e Bolsonaros në Botëror, duke ia dedikuar atij golin e parë të shënuar në “Katar 2022”. Gjë e cila, shpjegojnë ata nga Spanja, ishte shumë e tepërt.
Dhe shokët e skuadrës nuk e vlerësuan aspak, duke krijuar një atmosferë brenda dhomave të zhveshjes që nuk është më e mira dy javë para fillimit të Botërorit. Pa marrë parasysh që, siç ka shpjeguar vetë Neymar, kjo do të jetë përvoja e tij e fundit botërore. Dhe fakti që nis mes polemika, pikërisht si dy Botërorët e mëparshëm për të, nuk duhet të habisë askënd.
Discussion about this post