Në ndryshimet e propozuara nga qeveria në ligjin për akcizën, është parashikuar që gazi i cili përdoret për ngrohje ose gatim do të taksohet me 6 lekë për litër që prej janarit 2022. Ligji tashmë është shpërndarë për konsultim te grupet e interesit.
Deri më tani gazi që përdoret për gatim ka qenë i përjashtuar nga akciza dhe ky propozim ka ardhur me arsyetimin se janë bërë abuzime pasi importohej për qëllime konsumi vetjak dhe përdorej për automjetet. Aktualisht akciza është një taksë që i nënshtrohet gazit që përdoret për automjetet në nivelin 8 lekë për litër.
Nga unifikimi i akcizës për gazin e lëngshëm pritet që të arkëtohen rreth 3 milionë euro që pritet të paguhen kryesisht nga konsumatorët familjarë. Po sipas relacionit, ky projektligj synon të vendosë një nivel akcizë për gazin e lëngshëm pa diferencuar qëllimin e përdorimit pasi siç është formuluar ligji aktualisht i jep mundësinë abuzivizmit me sasinë e gazit që nuk paguan akcizë.
Nga sasia e importuar e kësaj lënde djegëse, rreth 2/3 nuk ngarkohet me akcizë, që presupozon se nuk përdoret si karburant për automjetet, ndërkohë që vetëm 1/3 e sasisë së importuar deklarohet për përdorim automjetesh dhe ngarkohet me akcizë.
