Qeveria ka hedhur për diskutim një draft ligj, sipas të cilit familjet shqiptare do të paguajnë sigurimin e detyrueshëm për banesën e tyre, në rastet e tërmeteve.
Qeveria parashikon që kjo taksë e re do të hyjë në fuqi nga 1 janari 2024, ndërsa pas tërmetit të 26 nëntorit të 2019-ës, disa herë Kryeministri Edi Rama përsëriste nevojën e sigurimit të banesave.
Taksa për sigurimin vjetor të banesës përfshin edhe ato në proces legalizimi, banesat sociale apo ato me qira.
Polica e sigurimit do të lëshohet nga një fond i posaçëm që do të jetë në pronësi të Ministrisë së Financave dhe qytetarët do të duhet të sigurojnë banesat e tyre, përveç atyre me qerpiç ose me kallama.
Çmimi i policisë së detyrueshme të sigurimit nga tërmeti do të përcaktohet me vendim qeverie. Raportohet se vlera e primit të mos jetë më e lartë se 1 euro për metër katror, bazuar kjo edhe në vlerën e tregut.
“Niveli i primit duhet të llogaritet me metodologji aktuariale, bazuar në modelin e rrezikut nga tërmetet të zhvilluar për Shqipërinë, e cila miratohet me vendim të Këshillit të Ministrave, mbas marrjes së mendimit të Autoritetit të Mbikqyrjes Financiare,” thuhet në projektligj.
Sipas projekt-ligjit, polica e sigurimit të detyrueshëm nga tërmetet mbulon dëmet e ndodhura në pronën e siguruar, të shkaktuara nga një apo disa ngjarje tërmeti të ndodhura gjatë periudhës së vlefshmërisë së përcaktuar në kontratë.
Ndërkohë, përjashtohen nga mbulimi i sigurimit të detyrueshëm nga tërmetet, lëndimet trupore duke përfshirë edhe humbjet e jetëve në banesë si pasojë e tërmeteve, kërkesa për kompensim të dëmeve morale, sendet brenda banesës së objektit të siguruar, shpenzimet në lidhje me heqjen dhe zhvendosjen e mbeturinave, humbjet financiare nga ndërprerja e biznesit dhe fitimi i munguar.
Pronarët të cilët nuk sigurojnë subjektet e tyre, nuk do të mund të marrin shërbim në e-Albania dhe as në QKB.
Polica e sigurimit është e vlefshme vetëm për një vit dhe në rast tërmeti dëmshpërblimi paguhet brenda 9 muajsh ne një vlerë që përcaktohet sipas metodologjive te qeverise.
Discussion about this post