Bordi i Entit Rregullator të Energjisë miratoi vendosjen e një tarife të re për karikimin e makinave elektrike në pikat dhe stacionet me fuqi të instaluar mbi 11 kW të lidhura në nivelin e tensionit 0.4 kV.
Sipas vendimit të miratuar, nga data 1 nëntor 2025 do të aplikohet çmimi i shitjes së energjisë elektrike prej 22 lekë për kWh dhe 25.3 lekë për kWh për orarin e pikut. Aktualisht, çmimi i karikimit është 14 lekë/kWh, çka do të thotë një rritje prej 57- 80 %.
Ky çmim do të zbatohet për një kategori të re konsumatorësh që kanë ndikuar ndjeshëm në rritjen e konsumit të energjisë dhe kostove të disbalancave në rrjet për shkak të përhapjes së automjeteve elektrike dhe pikave të karikimit të tyre.
Fashat orare të përcaktuara për aplikimin e çmimit të energjisë në orarin e pikut janë: për periudhën 1 nëntor deri më 31 mars nga ora 18:00 deri në 22:00 dhe për periudhën 1 prill deri më 31 tetor nga ora 19:00 deri në 23:00.Ky diferencim orar synon të reflektojë ngarkesën më të madhe në rrjet në periudha të caktuara të ditës dhe të nxisë një përdorim më të ekuilibruar të energjisë gjatë 24 orëve.
Discussion about this post