Agjencia e Trajtimit të Pronave ka njoftuar se, nga data 26 nëntor do të hapen aplikimet për të gjithë ata pronarë që iu janë prekur pronat nga ndërtimet pa leje. Përmes një njoftimet në faqen e saj zyrtare Agjencia e Pronave tregon se, së pari të gjithë të interesuarit duhet të dërgojnë një kërkesë për të marrë pjesë në këtë proces, përmes portalit e-Albania, ku do të tregojnë të dhënat e tyre verifikuese dhe të dhënat e pronës.
“Procesi i pranimit të kërkesave të subjekteve përfituesve do të fillojë në datën 26.11.2021 dhe nuk do të jetë i kushtëzuar dhe i kufizuar në kohë. ATP fton të gjithë subjektet e interesuara, të aplikojnë online në portalin e-Albania, për plotësimin e kërkesës për kompensim dhe dorëzimin e dokumenteve përkatës”, thuhet në njoftim. ATP tregon se procesi i kompensimit vazhdon pa afat deri në momentin që kompensohen të gjithë pronarët që shpallen fitues.
Në njoftim theksohet se, subjektet përfituese, kërkesa e të cilëve nuk është pranuar për mungesë dokumentacioni gjatë procedurave të mëparshme, kanë të drejtë të riaplikojnë.
Dokumentacioni
Ndër të tjera në njoftim thuhet se, Subjekti kërkues duhet të paraqesë dokumentacionin e mëposhtëm: Kërkesën për kompensimin e pronës, sipas formatit tip, që i vihet në dispozicion nga ATP. Duhet të paraqesi dëshminë e trashëgimisë për të gjithë trashëgimtarët e ligjshëm të subjektit përfitues, sipas radhës së trashëgimtarëve, në përputhje me përcaktimet e Kodit Civil.
Gjithashtu, bëhet me dije se personi që do të përfaqësojë pronarët e tjetër të pronës së përbashkët duhet të disponojë prokurën e posaçme, të nënshkruar nga të gjithë subjektet që përfitojnë kompensim, ku si tagër i nevojshëm të jetë edhe e drejta për të tërhequr vlerën financiare, në emër të tyre.
Më tutje sqarohet se, në rastet kur nuk është e mundur të dorëzohet prokura e posaçme, secili bashkëpronar apo një pjesë e tyre, paraqesin kërkesë individuale apo të përbashkët, për pjesën takuese në pronën që kompensohet.
Ndërkohë, në rastin e kërkesave individuale të secilit bashkëpronar apo të një pjese të tyre, për çdo kërkesë të kryer, paguhet tarifë shërbimi në vlerën 2 000 lekë.
Çdo aplikant duhet të disponojë vërtetimin origjinal të lëshuar nga një bankë e nivelit të dytë për hapjen e llogarisë bankare në emër dhe për llogari të subjektit përfitues, ku përcaktohet edhe numri i llogarisë bankare (IBAN), ku do të transferohet vlera financiare e përfituar.
Discussion about this post