DJ PM (Pajtim Krasniqi), i ftuar në “Natën me Aulonën”, ka ndarë shumë detaje nga jeta private, duke cekur tema të ndryshme: ankthin, marrëdhënien me Sarah Berishën dhe përvojën në “BBVA 1”.
Pajtimi tregoi për problemet me ankthin dhe tregoi se pas përvojës në “BBVA 1”, kishte nevojë për psikolog. Ai tha se ka qenë në psikolog dhe e ndjen të nevojshme të shkojë prapë, për shkak të lodhjes psikologjike.
“Është e natyrshme të flasësh me psikologun. Edhe njerëzit më të suksesshëm në botë kanë psikologë, sepse është e nevojshme për një njeri që të heqë mbingarkesën që ka. Kam qenë edhe më herët, para 1 viti e gjysmë, pas “BBVA 1”, por jo për arsye të formatit, apo personale të miat. Unë mendoj se çdo njeri që punon, veçanërisht në jetën e natës, e ka të vështirë, duke ia nisur që prej ushqimit, gjumit e të gjitha”, duke shtuar se sezoni i verës është edhe shumë i ngjeshur.
“Nuk është turp ta pranosh që ke nevojë për psikolog, që ke ankth. Duhet të flasësh me njerëzit, pasi këshilla të ndryshme të ndihmojnë sadopak”, shtoi DJ PM.
Sa i përket lidhjes me Sarën, ai tha se ndonjëherë i bërtasin njëri-tjetrit dhe më pas, qeshin me situatën.
“Kam dëgjuar që të kundërtat tërhiqen, por Sara me karakterin e saj, më përshtatet. Unë dhe Sara nuk e duam qendrën e vëmendjes, nuk jemi tipa që shfrytëzojmë njëri-tjetrin, që të bëjmë gjëra që të biem në sy. Ne kemi mbijetuar edhe pa shfrytëzime, ndaj nuk është ndihmesë e madhe që ta shfrytëzoj Sarën për lidhje. Kemi 2 vite bashkë dhe ende s’kam postuar ende foto me të në Instagram. E duam privatësinë dhe duam të jetojmë me rregullat tona”.
DJ PM sqaroi se Sarah nuk është shtatzënë dhe se kur të jetë, do e bëjë lajmin publik, sepse nuk ka pse ta fshehë lajmin. “Në momentin që do të bëhemi prindër, do e tregojmë me gjithë qejf”. Artisti shtoi se është momenti që të bëjnë një hap tjetër në lidhje.
“Ndoshta të bëjmë fëmijë, të fejohemi, të martohemi, të bashkëjetojmë”, tha ai, duke shtuar se deri më tani, lidhja i shijon shumë, pasi Sarah ia ka lehtësuar shumë lidhjen në distancë.
“Kur të vijë të jetojë këtej, e di që kur të shkojë ora 11 e darkës, duhet të shkoj më herët në shtëpi”, tregoi ai dhe shtoi se duhet të përshtatet.
Gjithashtu, ai e falenderoi publikisht partneren që nuk është fare xheloze dhe është super person në këtë aspekt. “Sarah më beson shumë dhe për këtë, ndoshta nuk kam fuqi dhe nuk më shkon as mendja t’ia thyej zemrën”.
PM foli edhe për përvojën në “BBVA 1”, duke thënë se së bashku me mikun e tij, DJ Dagz, nuk e kishin menduar se do të shkonin kaq larg. “Nuk e kishim menduar se do të mbërrinim deri këtu. Ne na kanë njohur njerëzit nëpër diskoteka, ata që frekuentojnë jetën e natës, por kurrë në jetë s’e kisha besuar që do të vinte momenti kur do më njihnin edhe në Laç, ose në Fier”, duke falenderuar edhe programit që i dha këtë mundësi, duke theksuar se e ngriti në anën profesionale dhe shpirtërore.
Discussion about this post