Rreth 1 mijë pasagjerë zbarkuan nga trageti që kryen linjën Brindizi-Vlorë të mërkurën në mëngjes. Për autoritetet portuale, frekuentimi i Portit të Vlorës, në kohën kur kanë filluar kthimet nga Vlora drejt Italisë, është mjaft i kënaqshëm.
“Sivjet jemi në parametra më të mirë se çdo vit tjetër, pothuajse kanë ardhur rreth 26 mijë pasagjerë. Vetëm sot kanë ardhur 1 mijë pasagjerë me një traget”, tha Festim Skëndaj, shef i përpunimit të trageteve në Portin e Vlorës.
Bie në sy numri i lartë i turistëve italianë që vijnë në Shqipëri për pushime. Bashkë me emigrantët shqiptarë që kthehen ata shprehin të njëjtin shqetësim: udhëtimi nuk është aspak komod.
“Kam ardhur për të vizituar familjen. Udhëtimi, edhe keq edhe mirë disa raste. I këndshëm udhëtimi, por na kanë trajtuar keq”, thanë udhëtarët.
Hera e parë në Shqipëri. Patëm probleme me biletat. Do rrimë një javë”, u shprehën disa turistë italianë.
Për drejtorin e kompanisë që operon në linjën Vlorë-Brindizi, Agron Brataj fakti që jemi në kulmin e sezonit, justifikon edhe ndonjë vonesë të trageteve.
Discussion about this post